Тако речет Петр волоский воевода: «Знаменуется в мудрых книгах, пишут философи и дохтуры о благоверном великом царе русском и великом князе Иване Васильевиче всея Руси, что будет у него в его царстве таковая великая мудрость и правда неправедным судиям от его мудрости великия, от Бога прироженныя».
Тако говорит Петр, волоский воевода, про руское царство, что велможи рускаго царя сами богатеют и ленивеют, а царство оскужают его, и тем ему слуги называются, что цветно и конно и людно выезжают на службу его, а крепко за веру християнскую не стоят и люто против недруга смертною игрою не играют, тем Богу лгут и государю. <…> Ино тако говорит Петр волоский воевода: «Таковому силному государю годится со всего царства своего доходы собе в казну имати, а ис казны своея воинником сердца веселити; ино казне его конца не будет. Который воинник лют будет против недруга государева играти смертною игрою и крепко будет за веру християнскую стояти, ино таковым воинником имена возвышати, и сердце им веселити, и жалованья им из казны своея государевы прибавливати; и иным воинником сердца возвращати, и к собе их близко припущати, и во всем им верити, и жалоба их послушати во всем, и любити, аки отцу детей своих, и быти до них щедру; щедрая рука николи не оскудевает и славу царю собирает: что государю щедрость к воинником, то его и мудрость». <…>
Так говорит Петр волоский воевода про Греческое царство: «Велможи греческия при царе Констянтине Ивановиче царством обладали, и крестное целование ни во что же ставили, изменяли, и царство измытарили своими неправыми суды, от слез и от крови християнския богатели и богатество свое наполнили нечистым собранием, и сами обленивели за веру християнскую крепко стояти, царя укротили от воинства своими вражбами и прелестными путми и ерестьми и чародействы; и тем царство греческое, и веру християнскую, и красоту церковную выдали иноплемянником турским на поругание. А ныне сами греки за свою гордость и за беззаконие и за ленивьство свое веру християнскую у царя турскаго откупают, – великия оброки дают царю турескому, а сами в неволе живут у царя турскаго за свою гордость и за ленивьство. Греки и сербы наймуются овец пасти и верблюдов у турскаго царя: и лутчия греки, и они торгуют». <…>
Да тако рек Петр волоский воевода: «У благовернаго царя Констянтина во Цареграде воинники оскужали и нищали, а мытари богатели. А иныя воинники, видячи тот непризор благовернаго царя к воинству, и они, оставивше воинство, да на мытарствах прелщалися, и царство царя Констянтина оскужали и казну цареву. А сами мытари богатели: и пошлют их где собрати царския казны, ино на царя где взяти 10 рублев, и они на царя возмут 10 рублев, а на себя 100 рублев. А кто их посылал, велможи царские, и те с ними, мытари, делилися, а царство благовернаго царя Констянтина оскужали и казну цареву, а сами богатели от крови и от слез рода християнскаго. А велможи друг о друге печаловалися царю Констянтину о кормлениях и о городех и о наместничестве, аки голодныя пси, хистятся на кровь и на слезы рода християнскаго. А царь всю их волю творил и во всем им сердце веселил, и усобную войну на царство свое напустил, велмож своих, и всем Бога разгневил».