Великий же государь Михайло Федорович, слышев сия ото вселенскаго собора благое увещание, «ото очию реки слез пролияше», и в слезном течении не могий что проглаголата, отойде на место к матери своей, великой государыне старице иноко Марфе Ивановне. Архиепискуп же Феодорит со всем освященным собором, и бояре Федор Иванович Шереметев с товарищи, и весь царский синклит, и гости, и христолюбивое воинство, и все православные хрестьяне, и всенародное множество всего Росийскаго царствия, стояху в соборной церкве и по всему монастырю, а елицы не вмещахуся в монастыре, и те все вне монастыря стояще, вси купно падша, главы своя повергше на землю, с великим плачем и рыданием мнозем велегласно вопияху на мног час: «О великая государыня, старица иноко Марфа Ивановна! Умилися над остатком роду хрестьянского, милосердуй о нас, пощеди. Благослови, даждь Богом избраннаго царя на царство, всем нам благонадежноого государя, всему Росийскому государству самодержца, сына своего единороднаго, благороднаго корени благорасленную ветвь, Михаила Федоровича». Такоже и сыну ее, великому государю нашему, Михайлу Федоровичю, били челом и молили со многим слезным рыданием и воплем многим прилежно, чтоб он, государь, пожаловал своих богомолцов, и бояр, и христолюбивое воинство и все православное крестьянство, скифетроцарствия царским венцом венчан был; царствующему ж граду Москве и всему Росийскому государству самодержец, а нам государь благонадежный. И великая государыня старица иноко Марфа Ивановна и сын ее, государь наш, Михайло Федорович к молению нашему никако же быша преклонны и не восхотеша нас пожаловата.
Архиепискуп же со всем вселенским собором, и боляре Федор Иванович Шереметев с товарищи, и весь синклит царский, били челом великой государыне, старице иноко Марфе Ивановне, и сыну ее, государю нашему, Михаилу Федоровичю со слезами на мног час, падше пред ногами ее; а всенародное бесчисленное множество, все православные хрестьяне, в церкве и в монастыре и вне монастыря, с великим плачем и воплем ото всея душа единогласно глаголюще: «Милосердая и христолюбивая, великая государыня, старица иноко Марфа Ивановна! Не презри пришедших в честную сию обитель пречистые Богородицы чюдотворнаго Ея образа, и угодников Ея, великих чюдотворцов Петра, и Олексея и Ионы, и всех святых благоугодивших; положите на милость, не оставте нас сирых и безгосударных». Великая же старица иноко Марфа Ивановна, слышав сия таковая прошения и моления, на мног час в недоумении быв, и умилися душею, слез многих исполнися, глагола: «О преосвященный Феодорит архиепискуп, и честных великих монастырей архимариты, и игумены и весь вселенский собор, и бояре! Прошение ваше выше нашие меры; на такову высоту царствия, и на престол такова великого преславнаго государства просите у меня сына моего единородиаго, света очию моею, Михаила Федоровича, и у меня на то мысли никак нету, а у сына моего Михаила по томуж никак мысли и хотения на то нету же; свидетель и сердца наша зрит Бог. И будет на то святая Его воля будет, якоже годе Господеви, тако и буди; воли бо Его никтоже может противитися; а без вышнего и всемогущего Господа Бога промысла и святой Его воли, вместо скорби и сетования, утешение ко исполнению вашего прошения и моления совершити не возможно».