Кондак, глас 5
На неувяда́емом дре́ве уго́днику яви́вшися,/ Твое́ же предста́тельство всем моля́щимся при́сно явля́ющи, Влады́чице,/ и на́шего не отврати́ смире́ннаго моле́ния,/ но прегреше́ний на́ших проще́ния испроси́/ и, ско́рби душ на́ших отъе́мши,/ благода́рственное на́ше приими́ поклоне́ние,/ да любо́вию Тя во ве́ки сла́вим, Всепе́тая.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
7/20 Преподобного Парфения, епископа Лампсакийского (IV). Преподобного Луки Елладского (ок. 946).
Тропарь общий святителю Парфению и преподобному Луке, глас 4
Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.
Кондак святителю Парфению, епископу Лампсакийскому, глас 3
Чуде́с прия́л еси́ Боже́ственную благода́ть,/ Богому́дре свяще́нне Парфе́ние,/ чудотво́рче Богоно́се,/ вся ве́рных стра́сти очища́я, ду́хи лука́вства, о́тче, изгоня́я./ Сего́ ра́ди тя воспева́ем,/ я́ко ве́лия таи́нника Бо́жия благода́ти.
Кондак преподобному Луке Елладскому, глас 8
Избра́вый тя Бог пре́жде созда́ния во Свое́ благоуго́дие,/ и́миже ве́дяще су́дьбами,/ при́сно от утро́бы освяща́ет/ и Своего́ раба́ показа́ тя,/ исправля́я твоя́ стопы́, Луко́, я́ко Человеколю́бец,/ Ему́ ны́не, ра́дуяся предстои́ши.
Величание
Велича́ем вас,/ святи́и отцы́ Парфе́ние и Луко́,/ и чтим святу́ю па́мять вашу,/ вы бо мо́лите за нас/ Христа́ Бо́га на́шего.
8/21 Великомученика Феодора Стратилата (319). Святителя Саввы II, архиепископа Сербского (1269). Блаженной Любови Рязанской (1921).
Тропарь великомученику Феодору Стратилату*, глас 4
Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре,/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою при́сно ублажа́ем.
Кондак, глас 2
Му́жеством души́ в ве́ру оболки́йся,/ и глаго́л Бо́жий, а́ки копие́, в ру́ку взе́м,/ врага́ победи́л еси́, му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.
Величание
Велича́ем тя,/ страстоте́рпче святы́й Фео́доре,/ и чтим честна́я страда́ния твоя́,/ я́же за Христа́/ претерпе́л еси́.
Тропарь святителю Савве Второму, архиепископу Сербскому, глас 4
Исправле́ние ве́ры и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши,/ сего́ ра́ди к честне́й ра́це моще́й твои́х любо́вию прикаса́емся,/ лобыза́ем их и ве́рно вопие́м:/ предста́ни в по́мощь воспева́ющим па́мять святу́ю твою́ и светоно́сную,/ святи́телю о́тче Са́вво пребога́те, мо́лимся,/ Христу́ Бо́гу мо́лися/ спасти́ся душа́м на́шим.