Кондак преподобному Тимофею, глас 4
Я́ко звезда́ многосве́тлая/ от восто́ка возсия́в,/ озари́л еси́ в сердца́х ве́рных/ доброде́тели чуде́с твои́х,/ чудоно́сче всеблаже́нне Тимофе́е.
Величание
Велича́ем вас,/ святи́и отцы́ Тимофе́е и Евста́фие,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.
Тропарь Божией Матери ради иконы Ее, именуемой Козелыцанская, глас 4
Весели́ся земле́ Полта́вская/ и все Оте́чество на́ше правосла́вное:/ се бо, я́ко светоза́рное со́лнце,/ яви́ся пречу́дная ико́на Твоя́, Преблагослове́нная Богома́ти,/ мир озаря́ющи мно́жеством чуде́с Твои́х,/ те́ми у́бо обрета́ем, я́же на земли́, вся блага́я и поле́зная,/ и су́щих, я́же на Небеси́, сокро́вищ сподобля́емся./ Сего́ ра́ди вопие́м Ти:/ ра́дуйся Похвало́ на́ша, приснопокланя́емая,/ спаси́ ны, моля́щияся Тебе́,/ еди́ная Наде́ждо и Ра́дование ве́чное пою́щих Тя.
Кондак, глас 3
Боголе́пно во смире́нии красу́ется оби́тель Красного́рская,/ осеня́емая и спаса́емая преди́вным о́бразом Влады́чицы Пречи́стыя,/ Небесе́ и земли́ Цари́цы Богоро́дицы,/ от него́же исто́чники благода́ти и ча́ша чуде́с оби́льно излива́ются,/ и усе́рдно притека́ющий исцеле́ния ве́рою прие́млют,/ и неве́рнии ве́рою кре́пкою сердца́ исполня́ют,/ и мы раби́ Твои́, Богома́ти, благода́рне вопие́м Ти:/ ра́дуйся, Предста́тельство христиа́н непосты́дное и оби́тели Твоея́ красото́ и ра́дование.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
Ино величание
Велича́ем Тя,/ Пресвята́я Де́во,/ и почита́ем светоно́сный о́браз Твой,/ его́же во утвержде́ние оби́тели сея́ положи́ла еси́,/ да пребу́дет непрекло́нна в век ве́ка от смяте́ния ересе́й.
22/7 Обретение мощей мучеников, иже во Евгении (395–423).
Тропарь мученикам, иже во Евгении, глас 4
Му́ченицы Твои́, Го́споди,/ во страда́ниих свои́х... (общий мученикам).
Кондак, глас тойже
От земли́ возсия́вше, я́ко свети́ла пра́вды,/ нече́стия всю отрази́сте мглу,/ и ве́рных просвеща́ете,/ му́ченицы Боже́ственнии,/ Тро́ицы побо́рницы.
Ин кондак, глас 8
Кре́пцыи ве́ры столпи́, добропобе́днии му́ченицы,/ за Христа́ подъе́мше разли́чныя му́ки/ и на ле́та мно́га сокрове́ни бы́сте,/ и ны́не яви́стеся, я́ко многоце́нное бога́тство,/ и в це́рковь Бо́жию че́стно носи́ми архиере́я Бо́жия дла́ньми,/ прося́щим раздава́ете, е́же на по́льзу./ Тем моли́теся о душа́х на́ших.
Величание
Велича́ем вас,/ страстоте́рпцы святи́и иже во Евге́нии,/ и чтим честна́я страда́ния ва́ша,/ я́же за Христа́/ претерпе́ли есте́.