А́бие же посе́м пою́т три́жды тропа́рь се́й, гла́с 6:
Посли́ благода́ть твою́ жизнода́вче, и кре́ст се́й освяти́, и все́м лю́дем твои́м яви́ его́ бы́ти по́мощь и утвержде́ние:
Диа́кон: Го́споду помо́лимся.
Ли́к: Го́споди поми́луй.
Иере́й чте́т моли́тву сию́:
Го́споди Бо́же сла́вы, о́тче вседержи́телю, Бо́же савао́ф, и́же дре́вом живота́ посреде́ рая́ су́щаго, прообрази́л еси́ животво́рный кре́ст единоро́днаго Сы́на твоего́: и вме́сто дре́ва преслуша́ния, его́же вку́сом вселука́вый зми́й пра́отцы на́шя, и с ни́ми ве́сь ро́д челове́ческий из рая́ изгна́, и в сме́рть привлече́, зна́мение о́наго живоно́снаго креста́, на не́мже возлю́бленный тво́й Сы́н пригвожде́н бы́в у́мре, и сме́ртию сме́рть умертви́, и всю́ си́лу диа́волю упраздни́, и живо́т ми́ру дарова́, це́ркви свое́й ору́жие непобеди́мое, освяще́ние же и покро́в держа́вен, и ве́ре утвержде́ние, и от все́х диа́вольских ко́зней изба́ву, и кре́пкое спасе́ния упова́ние, и живота́ получе́ния непосты́дную наде́жду дарова́л еси́. Те́мже мы́ раби́ твои́, толи́кия благода́ти твоея́ ту́не сподо́бльшеся, благода́рни су́ще, сла́ву и благодаре́ние и смире́нное поклоне́ние прино́сим твоему́ вели́честву, и мо́лимся уми́льно, я́ко да ми́лостивно при́зриши на зна́мение сие́ кре́стное, е́же ве́рнии раби́ твои́ от усе́рдия и тве́рдыя ве́ры и любве́, я́же к тебе́, сооружи́ша, в зна́мение побе́ды Сы́на твоего́, Го́спода на́шего Иису́са Христа́, свобо́ды же и избавле́ния на́шего: и низпосли́ на не́ небе́сное твое́ благослове́ние, и благослови́ и освяти́ е́, и испо́лни си́лы и благослове́ния о́наго дре́ва, на не́мже пригвожде́но бы́сть пресвято́е те́ло Го́спода на́шего Иису́са Христа́ единоро́днаго Сы́на твоего́, и́мже си́ла диа́воля попра́ся, и земни́и свобо́ду улучи́хом, и живота́ сподо́бихомся. Е́й, мо́лим тя́ Влады́ко пресвяты́й, святы́х ра́ди страсте́й, и святы́я кро́ве излия́ния, и животво́рныя сме́рти единоро́днаго Сы́на твоего́, Го́спода на́шего Иису́са Христа́, ю́же сове́том тебе́ Бо́га отца́ безнача́льнаго, и Пресвята́го твоего́ ду́ха во́лею, спасе́ния на́шего ра́ди на дре́ве кре́стном претерпе́, и те́ми дре́во кре́стное, е́же иногда́ согреша́ющым и злотво́рным ка́знь бя́ше, благослове́но, свя́то, животода́тельно же, и изба́ву согреша́ющым бы́ти сотвори́, е́же в мольбу́ ти́ прино́сим: посли́ ны́не благода́ть Пресвята́го твоего́ ду́ха, на зна́мение сие́ кре́стное, и благослови́ и освяти́ е́, и да́ждь ему́ бы́ти зна́мением стра́шным и кре́пким на вся́ враги́ ви́димыя и неви́димыя, прогна́ние же и отраже́ние все́х ко́зней, наве́тов же и прило́гов диа́вольских: лю́дем же твои́м да бу́дет покро́в держа́вен, ве́ре утвержде́ние, наде́жде подкрепле́ние, во бране́х побе́да, и во все́х доброде́телех преспе́яние, и все́м пред си́м зна́мением тебе́ кла́няющымся и мольбы́ принося́щым ми́лостивен послу́шатель, и все́х я́же ко спасе́нию проше́ний бога́тый пода́тель бу́ди. И я́коже кресто́м ми́р от грехо́внаго осужде́ния свободи́л еси́: си́це рабо́в твои́х, сие́ кре́стное зна́мение тебе́ от души́ ве́рно принося́щих, си́лою креста́ возлю́бленнаго Сы́на твоего́, всегда́ победи́тели бы́ти греха́ яви́, и вся́ земна́я и небе́сная твоя́ блага́я и́м да́руй, и кресто́м всегда́ к благо́му все́х ве́рных наставля́я, к восприя́тию небе́снаго венца́ приведи́. Ты́ бо еси́ освяще́ния исто́чник, и все́х благи́х бога́тый пода́тель, и тебе́ сла́ву возсыла́ем, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.