КАКО КРЕСТИСЯ ВОЛОДИМЕРЪ, И ДЕТИ СВОЯ КРЕСТИ, И ВСЮ ЗЕМЛЮ РУСКУЮ ОТ КОНЦА ДО КОНЦА, И КАКО КРЕСТИСЯ БАБА ВОЛОДИМЕРОВА ОЛГА
[811] ПРЕЖЕ ВОЛОДИМЕРА. СПИСАНО ИАКОВОМЪ МНИХОМЪ
Отче, благослови!
Паулъ святый апостолъ, церковный учитель и светило всего мира, посылая къ Тимофею писание, глаголаше: «Чядо Тимофею, еже слыша от мене многыми послухы, тоже предай вернымъ человекомъ, иже доволнеи будуть и иныхъ научити».[812] И блаженый апостолъ Лука евангелистъ къ Феофилу писаше, глаголя: «Понеже мнози начаша повести деяти о известныхъ вещехъ, бывшихъ въ насъ, изволися и мне, ходившю исперва и по всехъ писати тебе, державный Феофиле, да разумееши, о нихъже начатъ Исусъ творити же и учити».[813] Къ тому Феофилу написа Деяния апостольская и Еуангелие святый апостолъ Лука, по томъ многыхъ святыхъ писати начаша жития и мучения. Тако же и азъ, худый мнихъ Иаковъ, слышавъ от многыхъ о благовернемъ князе Володимери всея Руския земля, о сыну Святославле[814], и мало събравъ от многыя, добродетели его написахъ, и о сыну его, реку же святою славную мученику Бориса и Глеба,[815] како просвети благодать Божия сердце князю рускому Володимеру, сыну Святославлю, внуку Игореву[816], и возлюби ̀и человеколюбивый Богъ, «хотяй спасти всякого человека и въ разумъ истинный приити»,[817] и вжада святого крещения.
«Якоже жадаеть елень на источники водныя»,[818] тако вжада благоверный князь Володимеръ святого крещения, и Богъ сътвори хотение его. Пишеть бо ся: «Волю боящихся его сътворить и молитву ихъ услышить и спасеть ̀я».