О таковыихъ бо рече пророкъ: «Скори суть кръвь пролияти бес правьды. Си бо обещаваються кръви и събирають себе злая. Сихъ путье суть събирающеи безаконие, нечистиемь свою душю обиемлють».[880]
Блаженый же Борисъ якоже ся бе воротилъ и сталъ бе на Льте шатьры.[881] И реша къ нему дружина: «Поиди, сяди Кыеве на столе отьни, се бо вси вои въ руку твоею суть». Онъ же имъ отъвещааваше: «Не буди ми възяти рукы на брата своего и еще же и на старейша мене, егоже быхъ имелъ, акы отьца». Си слышавъше вои разидошася от него, а самъ оста тъкъмо съ отрокы своими. И бяаше въ дьнь суботьный. Въ тузе и печали, удручьнъмь сьрдьцьмь и вълезъ въ шатьръ свой, плакашеся съкрушенъмь сьрдьцьмь, а душею радостьною, жалостьно гласъ испущааше: «Сльзъ моихъ не презьри, Владыко, да яко же уповаю на тя, тако да с твоими рабы прииму часть и жребий съ вьсеми святыими твоими, яко ты еси Богъ милостивъ, и тебе славу въсылаемъ въ векы. Аминь».
Помышляшеть же мучение и страсть святаго мученика Никиты и святаго Вячеслава, подобно же сему бывъшю убиению, и како святей Варваре отьць свой убойца бысть.[882] И помышляаше слово премудрааго Соломона: «Правьдьници въ векы живуть и отъ Господа мьзда имъ и строение имъ от Вышьняаго». И о семь словеси тъчию утешаашеся и радоваашеся.
Таче бысть вечеръ и повеле пети вечерънюю, а самъ вълезъ въ шатьръ свой начатъ молитву творити вечернюю съ сльзами горькыми и частыимь въздыханиемь, и стонаниемь многымь. По сихъ леже съпати, и бяше сънъ его въ мънозе мысли и въ печали крепъце и тяжьце и страшьне: како предатися на страсть, како пострадати и течение съконьчати и веру съблюсти, яко да и щадимый веньць прииметь от рукы Вьседьржителевы. И видевъ, възбьнувъ рано, яко годъ есть утрьний. Бе же въ святую неделю. Рече къ прозвутеру своему: «Въставъ, начьни заутрьнюю». Самъ же, обувъ нозе свои и умывъ лице свое, начатъ молитися къ Господу Богу.
Посълании же приидоша отъ Святопълка на Льто ночь и подъступиша близъ, и слышаша гласъ блаженааго страстотьрпьца поюща Псалтырь заутрьнюю. Бяше же ему и весть о убиении его. И начать пети: «Господи! Чьто ся умножиша сътужающии! Мънози въсташа на мя»,[883] и прочая псалма, до коньца. И начатъ пети Псалтырь: «Обидоша мя пси мнози и уньци тучьни одьржаша мя».[884] И пакы: «Господи Боже мой! На тя уповахъ, спаси мя».[885] Таже по семь канонъ.[886] И коньчавъшю ему утрьнюю, начатъ молитися, зьря къ иконе Господьни рече: «Господи Исусъ Христе! Иже симь образъмь явися на земли изволивы волею пригвоздитися на крьсте и приимъ страсть грехъ ради нашихъ, съподоби и мя прияти страсть!»