По вься же дьни святыихъ мясопущь[948] святый отьць нашь Феодосий отхожаше въ святую свою пещеру, идеже и чьстьное тело его положено бысть. Ту же затворяшеся единъ до Врьбьныя неделя,[949] и въ пятъкъ тоя неделя, въ годъ вечерьняя, прихожааше къ братии и, ставъ въ двьрьхъ цьркъвьныихъ, учааше вься и утешая, подвига ради и пощения ихъ. Себе же недостоина творя, якоже ни единоя неделе, поне достигнути противу трудомъ ихъ. Многу же скърбь и мьчатание зълии дуси творяхуть ему въ пещере той; еще же и раны наносяще ему, якоже и о святемь и велицемь Антонии пишеться. Нъ явивыйся оному, дрьзати веля Тъ, и сему невидимо съ небесе силу подасть на победу ихъ.
Кто бо не почюдиться убо блаженууму сему, еже въ такой тьмьне пещере пребывая единъ, мъножьства пълковъ невидимыхъ бесовъ не убояся, нъ крепко стоя, яко храбъръ сильнъ, Бога моляаше и Господа Исус Христа на помощь себе призывающа. И тако победи я Христовою силою, яко къ тому не съмети имъ ни приближитися емь, нъ и еще издалеча мьчьты творящемъ ему. По вечерьниимь убо пении седъшю ему и хотящю опочинути, не бо николиже на ребрехъ своихъ ляжашеть, нъ аще коли хотящю ему опочинути, то, седъ на столе и тако мало посъпавъ, въстаняше пакы на нощьное пение, и поклонение коленомъ творя. Седъшю же ему, якоже речеся, и се слышааше гласъ хлопота въ пещере отъ множьства бесовъ, якоже се имъ на колесницахъ едущемъ, другыимъ же въ бубъны биющемъ, и инемъ же въ сопели сопущемъ, ти тако всемъ кличющемъ, якоже трястися пещере отъ множьства плища зълыихъ духовъ. Отьць же нашь Феодосий, вся си слышавъ, не убояся духъмь, ни ужасеся сьрьдцьмь, нъ оградивъся крьстьнымь оружиемь и, въставъ, начатъ пети псалтырь Давидову. И ту абие многый трусъ не слышимъ бывааше. Таче по молитве седъшю ему, се пакы бещисльныихъ бесовъ глас слышаашеся, якоже и преже. И преподобьнууму же Феодосию ставъшю и начьнъшю оно псалъмьское пение, глас онъ абие ищазааше. Сице же по многы дьни и нощи творяхуть ему зълии дуси, яко не дати ему ни мало опочинути, дондеже благодатию Христовою победи я, и възятъ от Бога власть на нихъ, якоже отътоле не съмети имъ ни прикоснутися ни къ месту тому, идеже блаженый молитву творяше.
Се бо пакы бысть пакость творящемъ бесомъ въ храме, идеже хлебы братия творяаху: овогда муку расыпающе, овогда же положеный квасъ на състроение хлебомъ разливааху и ину мъногу пакость творяще беша. Тъгда же старей пекущимъ, шьдъ, съповеда блаженууму Феодосию пакости нечистыихъ бесовъ. То же сь уповая, яко възятъ власть на нихъ отъ Бога, въставъ вечеръ и иде въ храмъ тъ, и затворивъ двьри о себе, ту же пребысть въ немь до утрьняя, молитвы творя. Якоже отъ того часа не явитися бесомъ на томь месте, ни пакости никоеяже творити имъ, запрещениемь преподобьнааго и молитвою.