, и велить в бедру горячей гвоздь колоть. И железо скипело в мертвой бедре. И Соломанъ рече: «Мертва бысть».
И схоронил ее с великою честию и у гробницы поставилъ стражи многие. И пришелъ посланник, а сторожи стерегут крепко. И посланник пустил на сторожей сонъ мертвой. И поснули сторожи. И посланникъ вынес гробницу со царицею и принесе на корабль, и побежал на корабле по морю. И прибежал к Порову царству, и оживилъ царицу и приведъ ко царю Пору живую. И царь Поръ посланнику великую честь воздал.
И после того сторожи от сна очьнулись, а гробницы и со царицею нетъ, и сказали царю Соломану: «Государь царь Соломанъ, твоя царица у нас украдена и з гробьницею». И царь Соломанъ в великую кручину впаде и в недоумение. И полете под небеса ясным соколом, и не обьемлет под небесным облаком, и поиде по земли лютым зверемъ, и не оптече нигде же, и попловет щукою в море, и не опловеть нигде же. И бысть Соломан в велицей печали.
И пришелъ сылный посол от царя Пора и рече царю: «Соломане, царь Поръ прислалъ к тебе, что в прошлое лето присылалъ еси ко мне посла своего и перстень златый в дарехъ прислалъ еси и со царицею моею пребыл еси в моемъ царстве, а ныне азъ с твоею царицею пребываю и твоя царица топера у меня Пора во царстве».
И царь Соломан печаленъ бысть.
И потом учалъ рать копити, и собрал войска своего 40 тысящ, и пошел на царя Пора со своими со многими силами. И проиде многие царства, и приде во царство ко царю Пору, и поставилъ свои крепкия воеводы и силу, и рече своимъ силам: царемъ и уланом, и сильным князем, и крепким воеводам: «Стойте вы с силами, а меня отпустите во царство ко царю Пору, увижю и услышу своим оком и ухом свою царицу, а вы, цари и уланы, и сильныя князи, и крепкие воеводы, ждите к себе от меня троенаго гласу, в кой час труба вострубитъ, и вы седлайте добрых коней, а в другой час труба вострубитъ — и вы поспешите, а добрых коней не жалейте, а в третей час труба вострубитъ, а глас заслышите, труба заговорит, аки заплачетъ, и вы напущайте, и секите, и топчите, живота не давайте, милости не кажите, а не будетъ троенаго гласа в день, в десятый час, и вы поидите во свою землю, и в мое царство, а меня не ждите — и в животе меня не будетъ и великую память по мне и по моемъ животе держите, а меня поминайте. А вы, цари и уланы, и силные князи, и крепкие воеводы, простите меня и благословите».
А сам царь Соломанъ пошел во царьство Порово в нищенском образе. И поиде по цареву двору, и узрила Соломона царица его, испужалась зраку его и рекла себе: «Не ушла есми от царя Соломана ко царю Пору». И учела в велицей тоски быть и думу думать, и приступи страх великъ. И пришел Соломанъ ко царице в полату, и рече ему царица: «Почто ты, царю Соломане, пришелъ?» А страх великъ держитъ от него. И Соломан рече ей: «Али ты меня знаешь, что аз пришелъ за твоею красотою и дорогим умом и сладисловом?» И царица рече ему: «Придет-де ко мне царь Поръ на постелю к потехе». И пошлет царица Соломана в полату в переделецъ, тут же прикрыетъ его ковром. В той час пришел царь Поръ ко царице и любует ее и изложит ее на царьскую постелю. И царица рече ему: «Что ты меня любуешь? А толко в те поры придетъ царь Соломанъ?»