Тебе́ Распе́ншагося и Погребе́ннаго, / А́нгел пропове́да Влады́ку, и глаго́лаше жена́м: / прииди́те ви́дите, иде́же лежа́ше Госпо́дь, / воскре́се бо, я́коже рече́, я́ко Всеси́лен. / Те́мже Тебе́ поклоня́емся, Еди́ному Безсме́ртному, / Жизнода́вче Христе́, поми́луй нас.
Стих: Хвали́те Го́спода вси язы́цы, похвали́те Его́ вси лю́дие.
Кресто́м Твои́м упраздни́л еси́, / ю́же от дре́ва кля́тву, / погребе́нием Твои́м умертви́л еси́ сме́рти держа́ву, / воста́нием же Твои́м просвети́л еси́ род челове́ческий. / Сего́ ра́ди вопие́м Ти: / Благоде́телю Христе́ Бо́же наш, сла́ва Тебе́.
Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.
Отверзо́шася Тебе́, Го́споди, / стра́хом врата́ сме́ртная, / вра́тницы же а́довы ви́девше Тя, убоя́шася, / врата́ бо ме́дная сокруши́л еси́, / и вереи́ желе́зныя стерл еси́, / и изве́л еси́ нас от тмы и се́ни сме́ртныя, / и у́зы на́ша растерза́л еси́.
Слава: Спаси́тельную песнь пою́ще, от уст возсле́м. / Прииди́те вси в дому́ Госпо́днем припаде́м, глаго́люще: / на дре́ве Распны́йся, и из ме́ртвых Воскресы́й, / и Сый в не́дрех О́тчих, / очи́сти грехи́ на́ша.
И ныне, Богородичен: Пре́йде сень зако́нная, / благода́ти прише́дши, / я́коже бо купина́ не сгара́ше опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гненнаго, / пра́ведное возсия́ Со́лнце, / вме́сто Моисе́я, Христо́с, / Спасе́ние душ на́ших.
Вход со Евангелием.
Све́те ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподобными. Сы́не Бо́жий, живо́т дая́й, те́мже мiр Тя сла́вит.
Таже, прокимен великий, глас 7: Кто Бог ве́лий, я́ко Бог наш? / Ты еси́ Бог творя́й чудеса́.
Стих 1: Сказа́л еси́ в лю́дех си́лу Твою́.
Стих 2: И рех: ны́не нача́х, сия́ изме́на десни́цы Вы́шняго.
Стих 3: Помяну́х дела́ Госпо́дня, я́ко помяну́ от нач́ала чудеса́ Твоя́.
И па́ки: Кто Бог ве́лий, я́ко Бог наш? / Ты еси́ Бог творя́й чудеса́.
По прокимне же возглашает диакон: И о сподо́битися нам слы́шанию свята́го Ева́нгелиа, Го́спода Бо́га мо́лим.
Лик: Го́споди поми́луй. Трижды.
Посем чтет Евангелие настоятель во олтари.
Евангелие от Иоанна, зачало 65 (Ин. 20:19–25).
Су́щу по́зде в день той во еди́ну от суббо́т, и две́рем затворе́нным, иде́же бя́ху ученицы́ Его́ со́брани, стра́ха ра́ди иуде́йска, прии́де Иису́с и ста посреде́, и глаго́ла им: мир вам. И сие́ рек, показа́ им ру́це и но́зе, и ре́бра Своя́. Возра́довашася у́бо ученицы́, ви́девше Го́спода. Рече́ же им Иису́с па́ки: мир вам. Я́коже посла́ Мя Оте́ц, и Аз посыла́ю вы. И сие́ рек, ду́ну и глаго́ла им: приими́те Дух Свят. И́мже отпустите́ грехи́, отпу́стятся им, и и́мже держите́, держа́тся. Фома́ же, еди́н от обоюна́десяте, глаго́лемый Близне́ц, не бе ту с ни́ми, егда́ прии́де Иису́с. Глаго́лаху же ему́ друзи́и ученицы: ви́дехом Го́спода. Он же рече́ им: а́ще не ви́жу на руку́ Его́ я́звы гвозди́нныя, и вложу́ пе́рста моего́ в я́звы гвозди́нныя, и вложу́ ру́ку мою́ в ре́бра Его́, не иму́ ве́ры.