Таже оба лика, сошедшеся вкупе, поют припев: Вели́чит душа́ моя́ / Воскре́сшаго тридне́вно от гро́ба, / Христа́ Жизнодавца.
И ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
И тропарь: Христо́с воскре́се: трижды. И ектениа.
Ексапостиларий. Самогласен:
Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть, / Па́сха нетле́ния, / міра спасе́ние. Трижды.
На хвалитех, поставим стихи 4, и поем стихиры воскресны, глас 4:
Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.
Крест претерпе́вый и смерть, / и воскресы́й из ме́ртвых, Всеси́льне Го́споди, / сла́вим Твое́ Воскресе́ние.
Стих: Хвали́те Его́ во гла́се тру́бнем, / хвали́те Его́ во псалти́ри и гу́слех.
Кресто́м Твои́м, Христе́, / от дре́вния кля́твы свободи́л еси́ нас, / и сме́ртию Твое́ю / естество́ на́ше му́чащаго диа́вола упраздни́л еси́: / воста́нием же Твои́м ра́дости вся испо́лнил еси́. / Те́мже вопие́м Ти: / воскресы́й из ме́ртвых, Го́споди, сла́ва Тебе́.
Стих: Хвали́те Его́ в тимпа́не и ли́це, / хвали́те Его́ во стру́нах и орга́не.
Твои́м Кресто́м, Христе́ Спа́се, / наста́ви нас на и́стину Твою́, / и изба́ви нас от се́тей вра́жиих, / воскресы́й из ме́ртвых, / возста́ви ны па́дшияся грехо́м, / просте́р ру́ку Твою́, Человеколю́бче Го́споди, / моли́твами святы́х Твои́х.
Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния, / вся́кое дыха́ние да хва́лит Го́спода.
Оте́ческих Твои́х недр не разлучи́вся, / Единоро́дный Сло́ве Бо́жий, / прише́л еси́ на зе́млю за человеколю́бие, / Челове́к быв непрело́жен, / и крест и смерть претерпе́л еси́ пло́тию, / безстра́стный Божество́м: / воскре́с же из ме́ртвых, / безсме́ртие по́дал еси́ ро́ду челове́ческому, / я́ко Еди́н Всеси́лен.
И стихиры Пасхи с припевы их, глас 5.
Стих: Да воскре́снет Бог, / и расточа́тся врази́ Его́.
Па́сха / свяще́нная нам днесь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския нам отверза́ющая. / Па́сха всех освяща́ющая ве́рных.
Стих: Я́ко исчеза́ет дым, / да исче́знут.
Прииди́те / от виде́ния жены́ благове́стницы, / и Сио́ну рцы́те: / приими́ / от нас ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.