Молитва о живых
Помяни, Господи Иисусе Христе, боже наш, милости и щедроты Твоя от века сущия, их же ради и вочеловечился еси, и распятие и смерть, спасения ради право в Тя верующих, претерпети изволил еси; и воскрес из мертвых, вознесся еси на небеса и садиши одесную Бога Отца, и призираеши на смиренныя мольбы всем сердцем призывающих Тя; приклони ухо Твое, и услыши смиренное моление мене, непотребнаго раба Твоего, в воню благоухания духовнаго, Тебе за вся люди Твоя приносящаго. И в первых помяни Церковь Твою Святую, Соборную и Апостольскую, юже снабдел еси честною Твоею Кровию, и утверди, и укрепи, и разшири, умножи, умири, и непреобориму адовыми враты во веки сохрани; раздирания Церквей утиши, шатания языческая угаси, и ересей восстания скоро разори и искорени, и в ничтоже силою Святаго Твоего Духа обрати. (Поклон).
Спаси, Господи, и помилуй богохранимую страну нашу, власти и воинство ся, да тихое и безмолвное житие, поживем во всяком благочестии и чистоте. (Поклон).
Спаси, Господи, и помилуй Великого Господина и Отца нашего Святейшего Патриарха Алексия, преосвященные митрополиты, архиепископы и епископы православныя, иереи же и диаконы, и весь причет церковный, яже поставил если пасти словесное Твое стадо, и молитвами их помилуй и спаси мя грешнаго. (Поклон).
Спаси, Господи, и помилуй отца моего духовнаго (имя его), и святыми его молитвами прости моя согрешения. (Поклон).
Спаси, Господи, и помилуй родителя моя (имена их), братию и сестры, и сродники моя по плоти, и вся ближния рода моего, и други, и даруй им мирныя Твоя и премирныя благая. (Поклон).
Молитва об усопших
Помяни, Господи, от жития сего отшедшия святейшия патриархи, преосвященыя митрополиты, архиепископы и епископы православныя, во иерейстем же и притче церковием, и монашестем чине Тебе послужившия, и в вечных Твоих селениях со святыми упокой. (Поклон).
Помяни, Господи, души усопших рабов Твоих, родителей моих (имена их), и всех сродников по плоти; прости их вся согрешения вольная и невольная, даруя им Царствие и причастие вечных Твоих благих и Твоея безконечныя и блаженныя жизни наслаждение. (Поклон).
Помяни, Господи, и вся в надежди воскресения и жизни вечныя усопшия, отцы и братию нашу, и сестры, и зде лежащие и повсюду, православныя христианы, и со святыми Твоими, идеже привещает свет лица Твоего, всели, и нас помилуй, яко Благ и Человеколюбец. Аминь. (Поклон).
Подажь, Господи, оставление грехов всем прежде отошедшим в вере и надежди воскресения, отцем, братиям и сестрам нашим, и сотвори им вечную память. (Трижды).