Молитва иная: О Пречистая Богомати, Всецарице! Услыши многоболезненное воздыхание наше чудотворную иконою Твоею, из удела Афонского в Россию пренесенною, призри на чад Твоих, неисцельными недуги страждущих, ко святому образу Твоему с верою припадающих! Якоже птица крилома покрывает птенцы своя, тако и Ты ныне; присножива сущи, покрый нас многоцелебным Твоим омофором. Тамо, идежи лютыя скорби превозмогают, Терпением и Ослабою явися. Тамо, идежи мрак отчаяния в души вселися да возсияет неизреченный свет Божества! Малодушныя утеши, немощныя укрепи, ожесточенным сердцам умягчения и просвещение даруй. Исцели болящия люди Твоя, о Всемилостивая Царице! Ум и руки врачующих нас благослови, да послужат орудием Всемощнаго Врача, Христа Спаса нашего. Яко живей Ти, сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да чудотворную помощь скоро получив, прославляем Живоначальную Нераздельную Троицу, Отца и Сына и Святого Духа, во веки веков. Аминь.
Пред иконой «Скоропослушница» Тропарь, глас 4-й: к Богородице притецем сущие в бедах, и святей иконе Ея ныне припадаем, с верою зовущее из глубины души: скоро наше услыши моление, Дево, яко Скоропослушница нарекшаяся, Тебе бо ради раби Твои в нужду готовую помощницу имамы.
Кондак, глас 8-й: в мори житейстем обуреваемии, треволнению подпадаем страстей и искушений. Подажь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, всеблагая Скоропослушнице.
Молитва: Преблагословенная Владычице, Приснодево Богородице, Бога Слова паче всякого слова на спасение наша родшая, и благодать Его преизобильно паче всех приявшая! Море явльшаяся божественных дарований и чудес приснотекущая река, изливающая благость всем с верою к Тебе прибегающим! Чудотворному Твоему образу припадающее, молимся Тебе, Всещедрей Матери человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити, все еже на пользу, во утешение и спасение коемуждо устрояющи. Посети, Преблагая, рабы Твоя благодатию Твоею, и подаждь негодующим цельбу и совершенное здравие, обуреваемым тишину, плененным свободу, и различными образы страждущих утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий, и душевнаго расслабления, оберевания страстей и грехопадений свободи рабы твоя, яко да непреткновенно во всяком благочестии пожившее в сем веце, и в будущем вечных благ сподобимся благодатию и человеколюбием Сына Твоего и Бога, Ему же подабает всякая слава, честь и поклонение со Безначальным Его Отцем и Пресвятым Духом, ныне и присно и во веки веков, Аминь.