Молитва первая
Благодарим Тя, Господи Боже наш, о всех благодеяниих Твоих, яже от перваго возраста до настоящаго, в нас, недостойных рабех Твоих (имена), бывших, ихже вемы и не вемы, о явленных и неявленных; яже делом бывших и словом: возлюбивый нас якоже и Единороднаго Твоего Сына о нас дати изволивый, сподоби и нас достойны быти Твоея любве. Даждь словом Твоим мудрость и страхом Твоим вдохни крепость от Твоея силы, и аще что хотяще или нехотяще согрешихом, прости и не вмени, и сохрани душу нашу святу, и представи ю Твоему Престолу, совесть имущу чисту, и конец достоин человеколюбия Твоего; и помяни, Господи, всех призывающих Имя Твое во истине, помяни всех, благая или сопротивная нам хотящих: вси бо человецы есмы, и всуе всяк человек; темже молимся Тебе, Господи, подаждь нам Твоего благоутробия велию милость.
Молитва вторая
Собор святых Ангел и Архангел, со всеми Небесными Силами, поет Тя и глаголет: Свят, Свят, Свят Господь Саваоф, исполнь небо и земля славы Твоея.
Осанна в вышних, благословен Грядый во Имя Господне, осанна в вышних. Спаси мя, Иже еси в вышних Царю, спаси мя и освяти, Источниче освящения; от Тебе бо вся тварь укрепляема есть, Тебе безчисленнии вои Трисвятую песнь поют. Тебе и аз недостойный, Седящему во свете неприступнем, Егоже ужасаются всяческая, молюся: ум мой просвети, сердце очисти и устне отверзи, яко да достойно возмогу пети Тебе: Свят, Свят, Свят еси Господи, всегда, ныне и присно, и в безконечныя веки веков. Аминь.
Молитвы святителя Иоанна Златоуста перед выходом из дома
Молитва первая
Отрицаюсь тебе, сатана, гордыни твоея и служения тебе, и сочетаюсь Тебе, Христе, во имя Отца, и Сына, и Святаго Духа. Аминь.
Молитва вторая
Огради мя, Господи, силою Честнаго и Животворящаго Твоего Креста, и сохрани мя от всякаго зла. Господи, направи ко благу путь мой, Господи, благослови все мои вхождения и исхождения. (После этого осенить себя Крестным знамением, т. е. перекреститься.)