1/141 Преподобного Симеона Столпника (459) и матери его Марфы (ок.428). Собор Пресвятой Богородицы в Миасинской обители (в память обре́тения Её иконы) (864) Черниговской-Гефсиманской (1869), Александрийской, Миасинской (864) и именуемой «Всеблаженная» (в Казани) (1905) икон Божией Матери.
Тропарь преподобному Симеону Столпнику, глас 1
Терпе́ния столп был еси,/ ревнова́вый2 пра́отцем, преподо́бне:/ Иову во страсте́х, Ио́сифу во искуше́ниих,/ и безпло́тных жи́тельству, сый в телеси́,/ Симео́не о́тче наш,/ моли́ Христа́ Бо́га спасти́ся душа́м на́шим.
Кондак, глас 2
Вы́шних ища́й, ни́жним совокупля́яйся, / и колесни́цу о́гненную сто́лп соде́лавый,/ тем собесе́дник а́нгелом был еси, преподо́бне,/ с ни́ми Христу́ Бо́гу моля́ся/ непреста́нно о всех нас.
Величание
Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Богородичен, глас 1
Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель ми́ра, / еди́на бо еси Ма́ти и Де́ва,/ присноблагослове́нная и препросла́вленная,/ моли́ Христа́ Бо́га мир дарова́ти всей вселе́нной.
Тропарь Божией Матери ради иконы Её, именуемой «Всеблаженная», глас 4
Торжество́ днесь пра́зднуем све́тлое, / се бо предлежи́т, о Всеблаже́нная, ико́на Твоя́ Всечестна́я,/ к ней же, любо́вию се́рдца вси приходя́ще, Влады́чице, поклоня́емся и те́пло Тебе́ вопие́м:/ изба́ви нас от бед и обстоя́ний.
Кондак, глас тойже
Во пра́здник Твой соше́дшеся, ве́рнии,/ свяще́нное ко сла́ве Бо́жией торжество́ Твое́, Влады́чице, днесь всеблагогове́йно соверша́ем,/ любо́вию же чту́ще честну́ю ико́ну Твою́,/ Тебе́ песносло́вим вси в ра́дости: / ра́дуйся, Де́во Честна́я Всеблаже́нная.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
Тропарь Божией Матери ради иконы Ее, именуемой «Черниговская-Гефсиманская», глас 5
Пречи́стая Влады́чице Богоро́дице,/ упова́ние всех христиа́н,/ поне́же* ина́го упова́ния не и́мамы ра́зве Тебе́,/ Всенепоро́чная Влады́чице моя́, Госпоже́ Богоро́дице,/ Ма́ти Христа́ Бо́га моего́./ Те́мже поми́луй и изба́ви мя от всех зол мои́х/ и умоли́ Ми́лостиваго Сы́на Своего́ и Бо́га моего́,/ да поми́лует окая́нную ду́шу мою́, / и да изба́вит мя от ве́чныя му́ки, и сподо́бит мя Ца́рствия Своего́.