Благоле́пие до́му Госпо́дня любя́,/ расточи́л еси́ неща́дно име́ние твое́ во украше́ние того́,/ преподо́бне Ера́зме,/ тем ны́не живя́ в дому́ Госпо́дни на Небеси́,/ моли́ и нам освяти́тися в жили́ще Госпо́дне.
Кондак, глас 8
Украси́вый це́рковь Богома́тере/ расточе́нием име́ния ти на сие́ ико́нами, Ера́зме сла́вне,/ себе́ же о том нераска́янием;/ пода́ждь и нам расточе́нием грехо́в свои́х/ и покая́ния лепото́ю* украси́вшимся/ це́рковию све́тлою Ду́хови Свято́му яви́тися.
Величание
Ублажа́ем тя,/ преподо́бне о́тче Ера́зме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
25/10 Святителя Тарасия, архиепископа Константинопольского (806).
Тропарь святителю Тарасию, архиепискому Константинопольскому, глас 4
Пра́вило ве́ры, и о́браз кро́тости... (общий святителю).
Кондак, глас 3
Правосла́вными догма́ты Це́рковь уясни́в/ и Христо́ву, блаже́нне, честну́ю ико́ну почита́ти/ и покланя́тися всех научи́в,/ обличи́л еси́ иконобо́рцев безбо́жное веле́ние./ Сего́ ра́ди вопие́м ти:/ о, о́тче, ра́дуйся, му́дре Тара́сие.
Величание
Велича́ем тя,/ святи́телю о́тче Тара́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
26/11 Святителя Порфирия, архиепископа Газского (420). Преподобного Севастиана Пошехонского (ок. 1500). Межетской иконы Божией Матери (1492).
Тропарь святителю Порфирию, архиепископу Газскому, глас 4
Пра́вило ве́ры, и о́браз кро́тости... (общий святителю).
Ин тропарь, глас тойже
Труды́ и боле́зни твоя́, я́же по благоче́стию,/ кто испове́сть, о́тче?/ день бо и нощь не преста́л еси́ трудя́ся,/ до́ндеже* от нече́стия* Га́зу очи́стив, благоче́стие насади́л еси́,/ тем я́ко всегда́ еси́ предста́тель о ста́де твое́м,/ та́ко, свя́те Порфи́рие,/ моли́ Христа́ Бо́га да спасе́т ду́ши на́ша.
Кондак, глас 2
Свяще́ннейшими твои́ми нра́вы украша́емь,/ свяще́нства оде́ждею озари́лся еси́,/ всеблаже́нне Богому́дре Порфи́рие,/ и исцеле́ний удобря́еши возвыше́ньми,/ моля́ся непреста́нно о всех нас.
Величание
Велича́ем тя,/ святи́телю о́тче Порфи́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Севастиану Пошехонскому, глас 4
Удали́вся ми́ра и водвори́вся в пусты́ни,/ до́брым по́двигом подвиза́ся,/ злострада́нием и внима́нием, и моли́твами,/ отню́дуже и по сме́рти источа́еши исцеле́ния,/ Севастиа́не о́тче наш,/ моли́ Христа́ Бо́га/ спасти́ся душа́м на́шим.
Кондак, глас 3
Сия́нием Ду́ха Пресвята́го, му́дре Севастиа́не, просве́щся,/ оста́вил еси́ я́же в житии́ молвы́,/ пусты́ню же дости́гл еси́, преподо́бне о́тче,/ возвесели́л еси́ и́же над все́ми Бо́га и Зижди́теля./ Сего́ ра́ди прославля́ет тя Христо́с, блаже́нне, Вели́кий Дарода́тель.