27/12 Преподобного Прокопия Декаполита, исповедника (ок. 750). Преподобного Тита, пресвитера Печерского, в Ближних пещерах почивающего (1190). Преподобного Тита Печерского, бывшего воина, в Дальних пещерах почивающего (XIV).
Тропарь преподобному Прокопию Декаполиту, исповеднику, глас 8
Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Проко́пие о́тче наш./ Моли́ Христа́ Бо́га спасти́ся душа́м на́шим.
Кондак, глас 4
Денни́цу днесь Це́рковь иму́щи,/ вся́кую злосла́вия мглу разгоня́ет,/ почита́ющи тя, Небеснотаи́нниче, Проко́пие пресла́вне.
Величание
Ублажа́ем тя,/ преподо́бне о́тче Проко́пие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь преподобному Титу, пресвитеру Печерскому, в Ближних пещерах почивающему, глас 1
Братолю́бие тя живу́ща ви́дев любве́ ненави́стник,/ победи́л тя во гнев,/ но, ве́дый твоя́ пре́жния труды́ лю́бве исто́чник Госпо́дь,/ преложи́ тя па́ки на братолю́бие,/ в не́мже ты про́чее пожи́в Богоуго́дне,/ моли́ся о нас, я́ко да поживе́м братолю́бие.
Кондак, глас 7
Смире́нию Госпо́дню подо́бяся,/ смири́лся еси́, свяще́нник сый пред лице́м го́рдаго диа́кона Ева́грия,/ беззло́бие Ти́те,/ за что прия́л еси́ не то́кмо вре́менныя жи́зни неотпа́дение,/ а́нгелу тя воздви́гшу,/ но и ве́чныя наслажде́ние,/ в не́йже лику́я, избавля́й нас лю́таго гне́ва и памятозло́бия.
Величание
Ублажа́ем тя,/ преподо́бне о́тче Ти́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Тропарь преподобному Титу Печерскому, бывшему воину, в Дальних пещерах почивающему, глас 3
Во́инство тле́нное оста́вль,/ в нетле́нном ввоени́лся еси́ Христо́ви,/ и ору́жием Его́ кре́стным победи́в подзе́мных эфио́пов,/ побе́ды вене́ц от Христа́, Ти́те, сла́вно прия́л еси́,/ Ему́же моли́ся дарова́ти нам мир и ве́лию ми́лость.
Кондак, глас 6
Во́ина Христо́ва хра́браго,/ щито́м преподо́бия обло́жшагося/ и во́ев неви́димых кре́пко победи́вша,/ прииди́те, ве́рнии, восхвали́м/ Ти́та крепкоду́шнаго и возопии́м:/ прииди́, свя́те, к нам и никто́же озлоби́т ны.
Величание
Ублажа́ем тя,/ преподо́бне о́тче Ти́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.