Видевъ убо благый Богъ тьрпение и съмерение отрока, обрати жестокое сьрьдце отьца его на милость къ сыну своему. Тъгда убо възвестиша ему отроци, глаголюще, яко «се уже четвертый день имать не въкушая брашьна, ни въ одежю рачить облещися». То же слышавъ, отьць его съжалиси зело его ради, блюдый, да не гладъмь и зимою умреть. Призъвавъ же и любьзно целовавъ и отпусти и́. Бы же тъгда вещь пречюдьна и плачь великъ, яко и по мрьтвемь. Рабы и рабыня плакахуться господина своего и яко отъхожааше отъ нихъ, иде жена, мужа лишающися плакашеся, отьць и мати сына своего плакастася, яко отлучашеся отъ нихъ, и тако съ плачьмь великъмь проважахути и́. Тъгда Христовъ воинъ ишедъ из дому своего, яко птица ис пругла истьргъшися или яко сьрна отъ тенета, тако скоро текый, и доиде пещеры оноя. Его же видевъше, отьци ти въздрадовашася радостию великою и, ставъше, прославиша Бога, яко услыша молитву ихъ. То уже оттоле многыимъ приходящемъ въ пещеру благословления ради еже от отьць техъ и друзии от нихъ бывааху чрьньци Божиею благодатию.
Тъгда же великий Никонъ и другый чьрньць святаго Мины манастыря, болярина тако наречемъ, съвещавъшася, тако отъидоста, хотяща особе сести. И пришьдъша надъ море, ту же и разлучистася отъ себе, якоже се апостола Павьлъ и Варнава на проповедание Христово, якоже пишеться въ Деянихъ апостолъ.[942] Боляринъ же, идый къ Костянтиню граду, обрете островъ среде моря и ту въселися въ ньмь. Поживе лета многа, трьпя зиму и гладъ, и тако успе съ миръмь. Се же и доныне островъ тъ зовомъ есть Боляровъ. Великый же Никонъ отъиде въ островъ Тьмутороканьскый,[943] и ту обретъ место чисто близь града, седе на немь. И Божиею благодатию въздрасте место то, и цьркъвь святыя Богородица възгради на немь, и бысть манастырь славьнъ, иже и доныне есть, прикладъ имый въ сий Печерьский манастырь.
По сихъ же пакы Ефремъ каженикъ отиде въ Костянтинь градъ и ту живяше въ единомь манастыри. Послеже же изведенъ бысть и въ страну сию и поставленъ бысть митрополитъмь въ городе Переяславли. Се же уже многыими наказании предъложение слову створихомъ, обаче отъселе на предълежащее слово възвратимъся, къде се все мину и по отходе отьць техъ.
Тъгда же блаженый отьць нашь Феодосий поставленъ бысть презвутеръмь повелениемь преподобьнааго Антония и бе по вся дьни божьствьную служьбу съвьршая съ всякыимь съмерениемь, бяше бо кротъкъ нравъмь, и тихъ съмыслъмь, и простъ умъмь, и духовьныя всея мудрости испълненъ. Любъвь же непорочьну имея къ всей братии, бе бо уже съвъкупилося братия яко до пяти-на-десяте. Преподобьный же Антоний, якоже бе обыклъ единъ жити и не трьпя всякого мятежа и мълвы, затворися въ единой келии пещеры, поставивъ въ себе место братии блаженаго Варлаама, сына болярина Иоана. И отътуда пакы преселися на инъ хълмъ Антоний и, ископавъ пещеру, живяше, не излазя из нея, идеже и доныне чьстьное тело его лежить. Тъгда же божествьный Варламъ постави надъ пещерою малу цьрквицю въ имя святыя Богородица, веля, да ту братия събираються на божьствьное словословие. То уже всемъ явлено бысть место то, бе бо мноземи суще преже не ведомо.