О ЗАЧАТИИ
[680] ЦАРСТВУЮЩАГО ГРАДА МОСКВЫ И О КРУТИЦКОЙ ЕПИСКОПИИ, КАКО БЫСТЬ
В лето 6714 (1206) князь великий Данил Ивановичь[681], после Рюрика, короля римскаго[682] въ 14 колене, пришед из Великаго Новаграда в Суздаль. И в Сузъдале родися ему сынъ, князь Георгий[683], и нареченъ Юрьи. И созда во имя его град Юрьевъ Польской. И в томъ граде церковь велелепну[684] созижде во имя Георгия Страстотерпца[685], каменную, на рези[686] и от подошвы и до верху. И по создании храма того поехалъ князь великий Данилъ Ивановичь изыскивати места, где бы ему создати град престолный к великому княжению своему. И взя съ собою некоего греченина[687], именемъ Василия, мудра и знающа зело и ведяща, чему впредь быти. И въехавъ с нимъ во островъ теменъ и непроходимъ зело. В нем же болото велико и топко. И посреде того болота и острова узрелъ князь великий Данилъ Ивановичь зверя превелика и пречюдна, троеглава и пестра велми пестринами различна и красна зело. И вопроси Василия греченина, что есть видение се пречюднаго зверя. И сказа ему Василий греченинъ: «Великий княже, на семъ месте созиждется град превеликъ и распространится царствие троеугольное[688], и в нем умножатся различных ордъ люди, то есть прообразует зверя сего троеглавнаго, а различнии на немъ цвети — то же есть прообразует различных орд люди». Посемъ князь великий в том же острове наехалъ посреде болота островъ малъ, а на немъ поставлена хижина мала, а живетъ в ней пустынникъ, а имя ему Букалъ. И потому и хижина именуема Букалова. И ныне на том месте Божиимъ повелением царской дворъ. И после того князь великий Данила Ивановичь с темъ же греченином Василием спустя 4 дни наехали горы, а в горахъ техъ стоитъ хижина мала, а в той хижине человек римлянин, имя ему Подонъ. И возлюби князь великий место сие, и на томъ месте себе домъ устроити восхоте. Той же мужъ Подонъ исполненъ Духа Свята и рече: «Князе, не подобаетъ ти зде веселитися, то есть место домъ Божий. Созижди ту храмъ, и пребудутъ архиереи Бога вышняго служителие». Князь же великий Данилъ Ивановичъ въ 6 лето на хижине Букалове заложи град и нарекоша имя ему Москва