Слышано же бысть матере царевы сия, яко обличися злоба ея, и паче ея прославися невестка ея, царица, и противъ ею бысть, по мысли ея, и срама ради и зависти невозможе стерпети, испивъ зелия люта и умре. Царь же, проводивъ, погребе ея по чину, якоже подобаетъ.
Царевичь же, храбрый юноша, и с полкомъ своимъ, дойде до града, идеже мати его пребываетъ. Вда ей грамоты царевы, отца своего, и положи пред нею дары велики. Она же паде на выю его, плакашеся, едва от радости не умре. Сказаша же ей, яко вторый сынъ ея, иже восхищенъ бысть зверемъ лютымъ лвицею, ныне живъ обретеся во царствии отца своего, у царя, и о победе такожде сказа. Она же прочте грамоты царевы, и виде сына своего и слыша о другомъ, отдохнувъ, наполнися радости. И воздавъ благодарение всесилному Богу, поклоняшеся душею и телом, и сердцемъ, благодарствивъ, скоро воставъ съ сыномъ своимъ, идяше къ царствию с полцы своими с великою радостию, благодарствивъ же и одаривъ онаго мужа, у негоже пребываше в дому.
И егда услышано бысть, яко царица близъ есть царьства своего, изыде же сынъ ея, царевичь, иже зверинескъ нарицашеся, со освященнымъ соборомъ, со кресты и со иконы, и с пениемъ. Возследъствующе князи, и боляре, и велможи, и вси людие града того со женами и з детми сретоша ю вне града с великою честию и звоны великими. И поведоша ю сынове ея в церковь Божию. Прииде же царь в церковь прежде пришествия ея и срете ю в церковныхъ дверехъ, прием ю за десную руку и веде ю во церковь Божию. Царь же и царица не могущи стояти от жалости великия на ногахъ своихъ, но поддержими бяху чады своими и боляры. И тако сотворивше молебная пения и благодарственное торжество, целова ю во уста. И поидоста в полату, и поклони же ся царица цареви и едва проглагола: «Радуйся и во веки живи». Царь же, похвативъ ю, облобыза, глаголя: «Прости ми, любимица моя благочестивая, по бесовской зависти в неведении согрешившаго и оскорбившаго тя, неповинну сущу». И сотвориша тогда празднество велие. Испроси царица у царя, еже отпустити осужденныя на смерть, и темничным разрешение, и отдати долги должникомъ, и сотворися тако. И бысть во царствии томъ радость велия зело о обретении царицы и чадъ ея. Царь же нача жити во царствии своемъ в радости велице, паче благочестиемъ и добродетелию сияя. Слышано же бысть и по окрестнымъ странамъ слава и храбрость детей его. Мнози же и данницы сотворишася им. Они же пребывающе благочестивно и благодарствующе, и славяше собравшаго ихъ вкупе Создателя своего, всещедраго Бога, в Троице славимаго, Отца и Сына и Святаго Духа. Во веки, аминь.