24. (:. Предпразднство благовещения пресвятыя Богородицы. И преподобнаго отца нашего захарии: И иже во святых отца нашего артемиа, епискпа фессалонитскаго.
Вечер, обычная кафисма. На Господи воззвах самогласен дне дважды, и мученичен, и подобны триоди три: и предпразднства, на 4: глас 4. Подобен: яко добля: Слава, и ныне, глас 2: благовествует гавриил: Вход. Прокимен: и чтения дне, и прочая служба преждесвященных. А идеже несть преждесвященных, на Господи воззвах, стихиры, подобны триоди три: и предпразднства 3. Слава, и ныне: благовествует гавриил: На стиховне самогласен триоди дважды, и мученичен. Слава, и ныне, предпразднства, глас 2: еже от века: На Утрени, Аллилуиа, и троичны гласа. Аще случится в субботу, или в неделю, на Бог господь.
Тропарь, глас 4: Днесь всемирныя радости начатки, предпразднственное воспети повелевают. се бо гавриил приходит, деве нося благовестие, и к ней вопиет: радуйся благодатная, Господь с тобою.
И обычныя кафисмы, и прочая по обычаю. Канон предпразднства, со ирмосом на 6, глас 4: и триоди по чину их. По 3–й песни, седален, глас 4. Подобен: явился еси: Нашествием духа всесвятаго: Слава, и ныне, другий: глас 3. Подобен: Красоте: Днесь вся тварь радуется: По 6–й песни,
Кондак, глас 8. Подобен: Взбранной: Всем земным начало спасения нашего ты еси Богородице Дево: Божий бо служитель с небес послан предстати тебе, великий чиноначальник гавриил, радость обрадованную ти принесе. тем вси зовем ти: радуйся невесто неневестная.
По 9–й песни, аще суббота, светилен предпразднства дважды. На стиховне триоди самогласен дне дважды: и мученичен. Слава, и ныне, предпразднства, глас 4: Языка егоже не ведяше: И час 1–й, с кафисмою, и с поклоны, по обычаю.
[Смотри] Подобает ведати, аще случится предпразднство благовещения пресвятыя Богородицы в субботу 3–я или 4–я недели постов.
В пяток вечера, кафисма обычная. На Господи воззвах, поем стихиры на 10: триоди самогласен дне дважды, и мученичны 4, гласа: и предпразднства на 4: Слава, предпразднства: И ныне, богородичен 1–й, настоящаго гласа. Вход, Свете тихий: прокимен: чтения дне. Да исправится: и прочее преждесвященных. [Смотри] Аще несть преждесвященных: На Господи воззвах, стихиры предпразднства на 6. Слава, предпразднства: И ныне, богородичен 1–й гласа. таже, Свете тихий, без входа. прокимен, и чтения дне. Посем: Сподоби Господи: и ектениа: Исполним вечернюю: На стиховне самогласен триоди, дважды писан на Господи воззвах: и мученичен по гласу его, от октоиха: припевы же глаголем обычныя: К тебе возведох: Слава, и ныне, предпразднства. По Ныне отпущаеши, тропарь предпразднства. таже ектениа: Помилуй нас Боже: и три поклоны великия. Посем: Всесвятая Троице: Буди имя господне: трижды. таже, достойно есть: и отпуст. [Смотри] Повечерие поем великое без поклонов. По 1–м трисвятом, Вместо, Просвети очи мои: глаголем тропарь предпразднства: Днесь всемирныя: По 2–м трисвятом тропари обычныя: Помилуй нас Господи: Канон октоиха мертвен. По Достойно: кондак предпразднства.