Типикон (Автор) - страница 258
Во святую и великую субботу вечера, о часе 10–м дне знаменает в великое, и во вся тяжкая.
И собравшеся во храм, благословившу иерею, поем вечерню по обычаю без кафисмы. На Господи воззвах, поем стихиры воскресны три, глас 1: Вечерния наша молитвы: и великия субботы самогласны три, глас 8, и праздника на 4. Слава, дне, глас 6: Днешний день тайно: И ныне, праздника, Послан бысть: Вход со евангелием. Свете тихий: Прокимен не глаголем, но абие иерей глаголет: Премудрость: и чтения дне по чину их. По скончании же чтения, ектениа малая, и возглас. и поем вместо трисвятаго: елицы во Христа крестистеся: Аллилуиа. Прокимен дне, и праздника. Апостол дне, и праздника. Вместо же херувимския песни поется: Да молчит всякая плоть: и по ряду божественная литургиа великаго василиа. Вместо Достойно, поем ирмос: Не рыдай мене мати: В храме же благовещения Богородицы поем ирмос: яко одушевленному божию кивоту: Причастен дне, и праздника.
Подобает ведати, яко аще случится в самую святую и великую неделю пасхи, еже есть кириопасха, праздник благовещения пресвятыя Богородицы.
В великую субботу вечера, на Господи воззвах, поставим стихов 10: и поем стихиры воскресны три, и великия субботы три: и праздника 4. Слава, глас 6: Днешний день тайно: И ныне, праздника, глас тойже: Послан бысть: Вход со евангелием. Свете тихий: Прокимен же не глаголется, но абие иерей: Премудрость: и чтения, 1–е чтение дне: В начале сотвори Бог небо и землю: едина паремиа: Таже праздника благовещения чтений 5. и прочая чтения дне, по чину их, и по ряду божественная литургиа великаго василиа. По отпущении же литургии, Бывает ядение, и чтение деяний святых апостол по чину их, якоже указася в великую субботу: и кончану бывшу чтению, благословившу иерею, глаголем трисвятое, и по Отче наш, Господи помилуй, 12: Слава, и ныне: Приидите поклонимся, трижды. таже псалом 50, и поем канон праздника, со ирмосом на 6: и великия субботы со ирмосом на 8. Катавасиа, ирмос субботный, оба лика вкупе. По 3–й песни, кондак и икос праздника, и седален дне. Слава, и ныне, праздника, и чтение праздника. По 6–й песни, кондак и икос дне, и чтение дне. По 9–й песни трисвятое, по Отче наш, тропарь: егда снизшел еси к смерти: Слава, и ныне, праздника, ектениа, и отпуст.
И аще будет время порану, Прилагается чтение дне: емуже чтому, Настоятель раздает свещи братии. Кандиловжигатель же взем благословение у настоятеля, и шед знаменует во вся. И по чтении исходим в притвор, предходящим настоятелю с лампадами, и затворшимся дверем, кадит по чину всю братию, и став пред великими враты церковными, кадит крестообразно трижды, и речет: Слава святей и единосущней: и нам отвещавшим: Аминь. И начинает настоятель тропарь, глас 5: Христос воскресе из мертвых: трижды. Посем поют братия трижды. Настоятель, стих 1: Да воскреснет бог: И братия: Христос воскресе: единожды. Настоятель, стих 2: яко исчезает дым: И братия: Христос воскресе: единожды. Настоятель, стих 3: Тако да погибнут грешницы: И братия: Христос воскресе: единожды. Настоятель, стих 4: Сей день егоже сотвори господь: И братия: Христос воскресе: единожды. И абие настоятель велегласно: Христос воскресе: И отверзшимся вратом входит, предыдущим лампадам, и настоятелю купно и братиям поющим: И сущим во гробех живот даровав. По внегда же внити ему во олтарь, глаголем слава, и поем тропарь праздника, глас 4: Днесь спасения нашего главизна: И ныне, тойже. Таже ектениа великая: Миром господу помолимся: и по возгласе начинает предстоятель ирмос: воскресния день: и поем Канон пасхи, со ирмосом на 8: ирмосы по дважды. И благовещения со ирмосом на 8: ирмосы по дважды: последи же ирмосы обою канонов, кийждо лик свой ирмос: таже катавасиа: воскресния день, оба лика вкупе: и тропарь: Христос воскресе: трижды. И по коейждо песни ектениа малая, и возгласы по чину их. По 3–й песни, кондак и икос пасхи, и впакои, и чтение в богослове: емуже начало: На стражи моей стану: По 6–й песни, кондак и икос праздника благовещения, и чтение в богослове же, емуже начало: воскресния днесь: Таже прокимен праздника, глас 4: благовестите: Стих: Воспойте господеви песнь нову: Всякое дыхание: евангелие луки, зачало 4: Во дни оны воставши мариам: Таже: воскресение христово: трижды. и стихира: воскрес Иисус: трижды, на глас 6. Посем песнь 6–я, и прочия две. На 9 песни поем припевы пасхи, и праздника. Светилен пасхи единожды, и праздника дважды. На хвалитех стихиры воскресны на 4, и благовещения на 4, с припевы их. Таже оба лика вкупе, припев 1: Да воскреснет бог: стихиры пасхи, глас 5, с прочими припевы их. Слава, благовещения, глас 8: Да веселятся небеса: И ныне, пасхи: воскресния день: и целование по обычаю, и поучение златоустаго. ектении, и отпуст. Исхождение же вне монастыря не бывает. Часы же поются но уставу пасхи.