Кондак, глас 6: На горе преобразился еси, и якоже вмещаху ученицы твои, славу твою, Христе Боже, видеша: да егда тя узрят распинаема, страдание убо уразумеют вольное, мирови же проповедят, яко ты еси воистинну отчее сияние.
И икос. На 9–й песни, честнейшую не поем, аще и в неделю, но поем припев праздника: Величай душе моя: Паки вжигают свещи братия. По 9–й песни, светилен: Свете неизменный: трижды. На хвалитех стихиры на 4, глас 4. Подобен: Званный свыше: Слава, и ныне, глас 8: Поят христос: Славословие великое. По трисвятом, тропарь праздника. ектении, и отпуст. И дается елей братии от кандила спасова. Поющим нам стихиру самогласну праздника, юже волит екклисиарх. и час 1–й, и конечный отпуст. и бывает литургиа порану, бдения ради. На Литургии, Антифон 1. Глас 2: Стих 1. псалом 65: Воскликните господеви вся земля, пойте же имени его, дадите славу хвале его. молитвами Богородицы спасе спаси нас. Паки другий лик тойже стих: Воскликните господеви: молитвами Богородицы спасе спаси нас. И паки 1–й лик, стих 2: псалом 76: Глас грома твоего в колеси, осветиша молния твоя вселенную, подвижеся и трепетна бысть земля. молитвами Богородицы спасе спаси нас. Таже 2–й лик, стих 3: псалом 103: Во исповедание и в велелепоту облеклся еси, одеяйся светом яко ризою. молитвами Богородицы спасе спаси нас. Слава, и ныне: молитвами Богородицы спасе спаси нас. Антифон 2–й: псалом 47: Стих 1: Горы сионския, ребра северова, град царя великаго. спаси ны сыне Божий, преобразивыйся на горе поющия ти: аллилуиа. Другий лик тойже. Стих 2: псалом 77: И введе я в гору святыни своея, гору сию, юже стяжа десница его. спаси ны сыне Божий, преобразивыйся на горе: Стих 3: Гору сионю, юже возлюби и созда яко единорога святилище свое. спаси ны сыне Божий, преобразивыйся на горе: Слава, и ныне: единородный сыне и слове Божий: Антифон 3, псалом 124, глас 6. Стих 1: Надеющийся на Господа, яко гора сион не подвижится во век. Тропарь: Преобразился еси на горе Христе Боже: Весь до конца. Стих Горы окрест его, и Господь окрест людей своих от ныне и до века. Тропарь: Преобразился еси: псалом 14. Стих 3: Господи, кто обитает в жилищи твоемъ? или кто вселится во святую гору твою? Тропарь: Преобразился еси: псалом 23. Стих 4: Кто взыдет на гору господню? или кто станет на месте святем его? Тропарь: Преобразился еси: Входное: Господи, посли свет твой, и истину твою, та мя настависта, и введоста мя в гору святую твою. Тропарь: Преобразился еси: Слава, и ныне: Кондак, глас тойже: На горе преобразился еси: Трисвятое. Прокимен, глас 4: яко возвеличишася дела твоя Господи, вся премудростию сотворил еси. Стих: благослови душе моя Господа: Апостол петрова послания, зачало 65: Потщитеся известно: Аллилуиа, глас 8: Твоя суть небеса: Стих: блажени людие: евангелие матфеа, зачало 70: Поят Иисус петра, и иакова, и Иоанна: За Достойно ирмос: рождество твое нетленно: и до отдания. Причастен: Господи во свете лица твоего пойдем, и о имени твоем возрадуемся во веки. На трапезе же разрешаем на рыбу, и елей, и вино, аще и среда или пяток. [Смотри] Подобает ведати, яко предание имамы от святых отец от спасительнаго сего праздника преображения, снедати гроздие, идеже обретается. благословение приемше от иереа. Принесену бывшу гроздию в церковь, и по анафоре раздроблену. Глаголется же и молитва на благословение гроздия. Внимай: яко аще кто от от братий снест гроздие прежде сицеваго праздника, то преслушания запрещение да приимет, и да не вкусит гроздие чрез весь август месяц, яко заповеданный устав презрев: яко да от сего навыкнут и прочии повиноватися уставу святых отец. Сие же запрещение бывает и блюдущим винограды братии. Гроздию же на трапезе по празднице сем, трижды в неделю подобает предлагатися братии: сиречь в понедельник, в среду, в пяток, да вкушают братия. Сей устав бывает и на смоквах, и над прочими овощьми: яве яко времена их, кое когда приспеет. Сия же глаголем кроме приносимых блюдущим смокви, и раздаемым: снедают бо сия.