Богородичен: Зача́тие без стра́сти, / прия́тие па́че сло́ва про́йде Рождества́ Твоего́, Богоро́дице: / проро́ки бо пропове́данное па́че естества́ та́инство нам яви́ся, / Сло́во Бо́жие, Сый Бог.
Ин
Ирмос: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / Свят еси́, Го́споди.
И́же пре́жде век из Отца́ ро́ждся па́че мы́сли, / из Де́вы напосле́док воплоти́ся, я́коже весть Сам, / хотя́ челове́чество обнови́ти, истле́вшее лука́ваго зми́я сове́том.
И́же в Вы́шних соседя́й Отцу́ и Ду́ху, / смири́вшееся естество́ челове́ческое ви́дев, / Сын Бо́жий Безнача́льный нача́ло прие́млет / и хо́щет пло́тию роди́тися, я́ко челове́к.
Богородичен: Святе́йши А́нгел и всея́ тва́ри / Сове́та Вели́каго ны́не А́нгела без се́мене ражда́ет пло́тию / на воззва́ние всем, пою́щим непреста́нно Ему́: / Свят еси́, Го́споди.
Катавасия: Пре́жде век:
Ипакои, глас 8:
А́нгел отроко́в ороси́ пещь, / ны́не же жен плач разреши́, глаго́ля: / Что прино́сите ми́ра? / Кого́ и́щете во гро́бе? / Воста́ Христо́с и Бог: / есть бо Жизнь и Спасе́ние ро́да челове́ческаго.
Песнь 4
Ирмос: На Кресте́ Твое́ Боже́ственное истоща́ние прови́дя, / Авваку́м, ужа́сся, вопия́ше: / Ты си́льных пресе́кл еси́ держа́ву, Бла́же, / приобща́яся су́щим во а́де, / я́ко Всеси́лен.
Во ад Боже́ственное низше́ствие Твое́, Христе́ Бо́же, ме́ртвым жизнь яви́ся: / Ты бо врага́ связа́л еси́ держа́ву до́ле, Благи́й, / и Небе́сную стезю́ челове́ком отве́рзл еси́.
Не истле́ во гро́бе пречи́стое те́ло Изба́вителя лежа́що, / но, я́ко си́лен, сокруши́ а́довы вереи́ / и воскре́се во сла́ве, Христе́, тридне́вно.
Ин, отцем
Отце́в нача́ток: Авраа́ма, Исаа́ка и Иа́кова почти́м, / я́ко из тех се́мене возсия́ Христо́с, / вопло́щься из Де́вы, я́ко Всеси́лен.
Пропису́яй бу́дущая соше́ствию Христо́ву Дании́л / зве́ри, я́ко о́вцы, показа всем я́ве: / прови́де бо бу́дущее, я́ко проро́к Бо́жий.
Грехо́вным не привлече́ни я́дом, / от пла́мене изба́вистеся, де́ти: / зла́та бо чисте́йше су́ще му́дрии, в пещи́ пре́лести не слия́шася.
Богородичен: Велегла́сно пропове́дуется ожида́ние язы́ков / и спасе́ние ми́ра па́че естества́ Рождество́ Твое́, Пречи́стая, Честна́я, / его́же пое́т оте́ческая па́мять днесь.
Ин
Ирмос: Жезл из ко́рене Иессе́ова / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи / прише́л еси́, вопло́щся / от Неискусому́жныя, Невеще́ственный и Бо́же. / Сла́ва си́ле Твое́й, Го́споди.
Жезл из ко́рене Иессе́ова, Де́во, прозябла́ еси́, / цвет процве́тшая неувяда́емый, всех Соде́теля, / зе́млю цвета́ми всю я́ко Бо́га украша́ющаго, вопию́щую Ему́: / сла́ва си́ле Твое́й, Го́споди.