бо и не отлучашеся от него, служа тому съ съмерениемь, бе бо уже болезнию лютою одьрьжимъ.
И якоже пришьдъши суботе и дьни освитающу, посълавъ, блаженый призъва вьсю братию, и тако по единому вься целова, плачющася и кричаща о разлучении таковааго имъ пастуха. Блаженый же глагола имъ сице: «Чада моя любимая и братия! Се бо и утробою вься вы целую, яко отхожю къ Владыце, Господу нашему Исус Христу. И се вамъ игуменъ, его же сами изволисте. Того послушайте, и отьця того духовьнааго себе имейте, и того бойтеся, и по повелению его вься творите. Богъ же, иже вься словъмь и премудростию сътвори, тъ васъ благослови и сънабъди от проныриваго без беды, и неподвижиму и твьрьду яже къ тому веру вашю да съблюдеть въ единоумии и въ единой любъви до последьняаго издыхания въкупе суще. Дай же вамъ благодать, «же работати тому бес прирока, и быти вамъ въ единомь теле и единемь духъмь въ съмерении сущемъ и въ послушании. Да будете съвьрьшени, якоже и отьць вашь небесьный съвьрьшенъ есть. Господь же буди съ вами! И о семь же молю вы и заклинаю: да въ ней же есмь одежи ныне, въ той да положите мя тако въ пещере, идеже постьныя дьни пребываахъ, ниже омывайте убогаго моего тела, и да никътоже от людий мене, нъ вы едини сами да погребете въ прежереченемь месте тело се». Си же слышавъше братия от усть евятаго отьца плачь и сльзы изъ очию испущааху.
Блаженый же пакы утешая глаголааше: «Се обещаюся вамъ, братия и отьци, аще и телъмь отхожю от васъ, нъ духъмь присно буду съ вами. И се, елико же васъ въ манастыри семь умьреть, или игуменъмь къде отсъланъ, аще и грехы будеть къто сътворилъ, азъ имамъ о томь предъ Богъмь отвещати. А иже отъидеть къто о себе от сего места, то же азъ о томь орудия не имамъ. Обаче о семь разумейте дьрьзновение мое, еже къ Богу: егда видите вься благая умножающаяся въ манастыри семь, ведите, яко близь владыкы небесьнааго ми сущю. Егда ли видите скудение суще и вьсемь умаляющеся, тъгда разумейте, яко далече ми Бога быти и не имуща дьрьзновения молитися къ нему».
Таче по глаголехъ сихъ отпусти я вънъ вься, ни единого же у себе оставивъ. Единъ же от братие, иже вьсегда служааше ему, малу сътворь скважьню, съмотряше ею. И се блаженый въставъ и ниць легъ на колену, моляше съ сльзами милостивааго Бога о спасении душа своея, вься святыя призывая на помощь и наипаче же — святую владычицю нашю Богородицю, и тою Господа Бога Спаса нашего Исус Христа моля о стаде своемь, и о месте томь. И тако пакы по молитве възлеже на месте своемь и, мало полежавъ, таче възьревъ на небо, и великъмь гласомь, лице весело имый, рече: «Благословленъ Богъ, аще тако есть то: уже не боюся, нъ паче радуяся отхожю света сего!» Се же, якоже разумети есть, яко обавление некое видевъ, сице издрече. Яко по томь опрятавъся, и нозе простьръ, и руце на пьрьсьхъ крьстообразьне положь, предасть святую ту душю въ руце Божии и преложися къ святыимъ отьцемъ.