В лето 6452. Игорь совокупи воя многы — варягы, и русь, и поляны, и словены, и кривичи, и тиверцы, и печенегы ная и тали в нихъ поемъ, поиде на грекы в лодьяхъ и на конехъ, хотя мьстити себе. Се слышавше, корсунци послаша къ Роману, глаголюще: «Се идуть Русь, покърыли суть море корабли». Тако же и болгаре послаша весть, глаголюще: «Идуть Русь и печенегы наяли суть к собе». Се слышавъ, цесарь посла къ Игореви лутьшии бояры, моля и глаголя: «Не ходи, но возьми дань, юже ималъ Олегъ, и придамъ еще къ той дани». Такоже и печенегомъ послаша паволокы и золото много. Игорь же, дошедъ Дуная, съзва дружину, и нача думати и поведа имъ речь цесареву. Ркоша же дружина Игорева: «Да аще сице глаголеть цесарь, то что хощемъ боле того: не бившися, имати злато, и серебро, и паволокы? Еда кто весть: кто одолееть, мы ли, они ли? Или с моремъ кто светенъ? Се бо не по земли ходимъ, но по глубине морьстий — и обьча смерть всемъ». И послуша ихъ Игорь, и повеле печенегомъ воевати Болгарьскую землю, а самъ, вземъ у грекъ злато и паволокы на вся воя, възвратися въспять и приде къ Киеву въсвояси.
В лето 6453. Присла Романъ, и Костянтинъ и Стефанъ слы къ Игореви построити мира перваго. Игорь же глаголавъ с ними о мире. Посла Игорь мужи свои къ Роману. Романъ же събра бояры и сановникы. И приведоша рускыя слы, и повелеша глаголати и писати обоихъ речи на харотью:
«Равно другаго свещания, бывшаго при цесаре Романе, и Костянтине, и Стефане,[330] христолюбивыхъ владыкъ. Мы от рода рускаго слы и гостье: Иворъ, солъ Игоревъ, великаго князя рускаго, и обьчии сли: Вуефастъ Святославль, сына Игорева, Искусеви Олгы княгыня, Слуды Игоревъ, нетий Игоревъ, Улебъ Володиславль, Каницарь Предславинь, Шигобернъ Сфандръ, жены Улебовы, Прастенъ Турдуви, Либиарь Фастов, Гримъ Сфирковъ, Прастенъ Якунъ, нетий Игоревъ, Кары Тудковъ, Каршевъ Тудоровъ, Егри Ерлисковъ, Воистовъ Иковъ,[331] Истръ Яминдовъ, Ятьвягъ Гунаревъ, Шибьридъ Алдань, Колъ Клековъ, Стегги Етоновъ, Сфирка, Алвадъ Гудовъ, Фудри Тулбовъ, Муторъ Утинъ, купець Адунь, Адолбъ, Ангивладъ, Улебъ, Фрутанъ, Гомолъ, Куци, Емигъ, Турьбридъ, Фурьстенъ, Бруны, Роалъдъ, Гунастръ, Фрастенъ, Инъгелдъ, Турбернъ и другий Турбернъ, Улебъ, Турбенъ, Моны, Руалдъ, Свень, Стиръ, Алданъ, Тилий, Апубкарь, Свень, Вузелевъ, и Синько биричь, послании от Игоря, великаго князя рускаго, и от всея княжья и от всех людий Руское земли. И от техъ заповедано объновити ветхый миръ и от ненавидящаго добра, вьраждолюбца дьявола разореный от многъ лет, утвердити любовь межю Грекы и Русью.