Апполон же изыде от цесаря, размышляя в себе, како избыти смерти, — яко и гадание предложи, а смерти не убеже; и положи во уме бегьством избавление получити. И тайно наят корабль, и в первы сумрак, оставя кони, вниде со всеми своими, нача в корабле бежати. Заутра же сказа Антиоху, яко Апполон убеже. И рече Антиох: «Како может убежати, толикою дерзастию обесчестя нас, по своей воли предложив мое гадание?» И повеле учинити такову заповедь, яко аще кто жива ему Апполона приведет, дастъ 500 000 литръ злата, а кто главу принесет — 100 000 литръ. И таковую заповедь слыша, мнози поощришася сребролюбцы на поимание Апполона, не точию враги, но и друзи, желающе от Антиоха честь и дары великия прияти.
Апполон же прибеже в свой Тир град, советуя со своими и рече: «Не хощу себе ради и вас погубити, яко велий на мя Антиохов гнев излияся, но отъиду от васъ». Гражданя же вси плачюща, воли его повинушася. Он же повеле корабль насыпати пшеницы, и многое множество взя с собою злата, и сребра, и драгоценных вещей, и вниде в корабль, побеже спешно. Егда же Апполон отъиде, прииде в Тир от Антиоха клевоща ему шепотник[1362] именем Тарбата и нача вопрашивати о Апполоне, извествуя его себе друга и якобы хощет приятелство ему показати. Извещение же от граждан прием, отъиде.
Апполон же прибеже ко граду Тарсу[1363] и нача ту во граде жити. Бысть же в той земли тогда глад велий, куповаху бо пшеницы меру по 8 златых. Апполон же откры корабль, повеле гражданом продавати пъшеницы меру по 8 пенязь[1364]. По разпродании же пшеницы повеле и пенязи возвратити, дабы его купцем не звали; и град Тарсъ предобро и премудре устрой. Граждане же таковое благодетелство от Апполона приемше, отца его себе нарицаху и за толикую его милость на честь и славу образ[1365] его посреди града поставиша.[1366]
Некогда же Апполону изшедшу из града и ходя по брегу моря, в то время некто Елавик, его земли славный человекъ, еха по морю. Узре жа Апполона, рече ему: «Здрав буди, Апполоне, кралю великий, извествую ти заповедь о тебе Антиохову, аще и под смертию запрещено». Апполон же рече: «Скажи, друже мой и брате, кая о мне есть заповедь?» Елавикъ же рече: «Таковую заповедь о тебе преложи: аще кто тя жива приведет, дастъ ему 500 000 злата, аще же главу принесет — 100 000. Извествую же, яко и во граде имаши своем врагов многихъ, хотящих погубити тя». Апполон же дарова ему 500 000 злата, глаголя: «Между драгих всего сего света дражая всего здравие свое. Ты же, яко хранитель живота моего, имей сие от мене, еже бы имети от Антиоха за невинную погибель мою». Елавик же не хотя прияти, глаголя: «Тебе паче должно мне есть что принести, яко странствовати и бегати хощеши». И рече Апполон: «Ты ми преболшая дарова, а от мене, еже даю ти, приими». Приемъ Елавик, отъиде.