рече Апполону: «Како ти ся мнит о тонцах прекрасныя сея кралевны?» Апполон же точию главою помовая
[1373], ничтоже отвеща. Видев же сия кралевна, печална бысть зело. Рече же ей отецъ: «Прелюбезная моя дщи, проси от мене что хощеши, и дам ти». Она же, показав рукою на Опполона, рече: «Отче, докуду сего вижю, весела быти не могу, ниже что от тебе просити буду». Краль же начат ю вопрошати, что есть противу ея вина его. Она же рече: «Како, отче, не вина? Вси мя почтоша и похвалиша, сей же наругася мне, посмеяся тонцованию моему». Краль же нача вопрошати Апполона, чего ради посмеялся кралевне, главою помовая. Рече же Апполон: «Кралю милостивый и великий, аз не кралевне ругаяся главою помовал. Она убо честна, благоразумна, благородна и прекрасна, но в тонцовод-телствех ея дивнаго несть, понеже сам аз премножа сего умею и болши изучил, нежели кралевна». И рече отецъ ко дщери: «Возлюбленная, никто того не отреет
[1374], кто что в самом себе имеет. Тому не удивляйся, но повелим ему показати свою хитрость
[1375]». И повеле же.
Нача же Апполон тешити краля и кралевну. Восприем гусли, толико благостройно звецая и благогласно, яко изуметися всем и удивлятися. Потом нача тонцовати таково благохвално, яко всем председящим вопити: «Лутчи попремногу сей человекъ умеет, нежели кралевна». Кралевна же видя, зело возревнова[1376] учению Апполоню, дабы ей тех поступокъ и устроения[1377] научитися. И возлюби Апполона.
Пришедши ко отцу, кланяяся благочинно и молит отца, дабы ей предал Апполона во учителя. Кралю же дщерино прошение улюбися, повеле Апполона приписати к ближним своим велможам и храмы[1378] на своем дворе особые ему дати. Восприим же Апполон кралевну Лучницу ко учению и учил со всяким прилежанием и скоро научи и наказа[1379]. Не возре же во весь той год пристрасно на ню, ниже она на него. Зело же возлюби краль Алтыстратес Апполона премудрости его ради и мужества; проуведа же, яко бе и краль Тиру. Ноипаче же кралевна учителя своего возлюби.
По сем превеликих родов и отецъ чада приехаша ко кралевне приказыватися[1380], понеже зело красна, и благородна, и премудра въ елнинском наказании[1381]. Но отецъ, краль Алтыстратес, не восхоте дати ни за кого, точию аще кого сама восхощет. И по многих приехаша два великия кралевичи во многом уряжении и многолюдстве. Краль же восписа листъ ко дщери: «Возлюбленная моя дщи, приехаша к нам нецыи благородны и благоплеменитии кралевичи, хотяще, кого от них благоволиши, прияти тя в жену. Аз же обещахся тебе, яко быти сему по воли твоей. И се вемъ, яко девицам есть природный стыд, еже дерзновено о сем рещи. Ты же мне отпиши намерение свое и назнамени имя того, егоже изволишь, не точию же сих приехавших, но нища ли или богата; несть бо равна мне в богатстве, несть жа и убога, дабы его не обогатил».