По времени же некоемъ в торжестве на пировании разблажися сердце царево и вопроси отрокъ техъ, коего граду бяху и коего отечества. Юноша же той, иже от царицы оныя испросився ратоватися с сопостаты, воставъ, рече: «Азъ, благий царю, не вемъ, каковъ бе отецъ мой, но слышавъ у госпожы святыя моея матере, яко бе она царица некоего царя благочестива и славна, живяше со отцемъ моимъ, мужемъ своимъ, в законе Божии, в совершенной любьви и союзе, и храняста оба союзъ, якоже подобаетъ мужемъ и женамъ благочестивымъ без порока. И бяше бо мати моя милостива и благочестива зело и любима бяше отцемъ моимъ, царемъ благочестивымъ, о немъ, и почитаема подначалствующими властьми, князи, и боляры, и велможи, и всеми народы добродетелнаго ради ея нрава.
Имяше же царь той, отецъ мой, у себе мать горду, и неблагородну, завистливу и ненавистну, и тая убо бяше от велмож и от народа презираема за злонравие ея, бяше бо властолюбица. И завиствуя бо на матерь мою, яко почитаема паче ея от народа бысть, имя ея обношашеся во всехъ устехъ паче ея, матере царевы. И искаше времени, да сотворитъ пакость матери моей, и возсмердитъ ея сыну своему, а моему отцу, царю, и народу. И во многое время невозможе обрести вины, всяко злохитръствуеши. Егда же Божимъ изволениемъ отецъ и мати моя зачаста насъ законно, и по времени роди мати наю, мене и другаго сыны, царю, и отецъ нашъ ради рождения нашего радостенъ бысть, иде в церковь Божию молебная совершати. В той часъ мати наша по рождению наю в полате почиваше, от истомления и от напоения спяше крепко. Мати же царева, окаянная баба наю, навождениемъ вражиимъ от зависти умысли, и призва от царевы полаты мужа, доброродна теломъ, а проста нравомъ, часто предстояща цареви. И глагола ему ласковыми словесы, злокозньствуя, ово дары обещевая ему, ово сановство велико, принуди его возлещи к матери моей на одръ без гащь. А сама в той часъ скоро шедша к сыну своему, царю, отцу нашему, в церковь и рече ему: „Что ты радостная, царю, твориши торжество рождения ради чадъ своихъ, а не веси того, что лстивая жена твоя ныне творитъ, в полате с предстоящимъ тебе мужемъ онымъ прелюбодействуетъ. И та рожденная чада не от твоего семени есть, но оного мужа прелюбодейца, иже на одре возлежит с нею. Аще ли не имеши веры, иди и виждь". Отецъ же мой, царь, слышавъ таковая, оставивъ молебная пения, и скоро иде в полату к матери моей. И виде у нея на одре лежаща служащего ему, вземъ мечь, пронзе его. Муж же той вскрича и умре. Мати же моя о сихъ ничтоже веде, возбнувъ от крича того и ужасеся, не могий, что молвити.