мне самоцветной камень». И Соломан рече царице: «Тот мне камень нести ко царю Давиду в поминок
[1530], а другой камень дати в придания, а третей камень держю про себя, на кораблях да светит». И царица рече ему: «Что говоришь, в приданые дать?» И Соломан рече: «Хто со мною пребудет, тому дам камень самоцветной». И царица рече: «Азъ с тобою пребуду, гость-заморянин». И Соломан рече: «Царица, дай мне сроку, отнесу царю Давиду камень и к тебе принесу, и с тобою пребуду».
И пошел Соломан на корабль свой и взя камыки[1531] и пойде ко царю Давиду. И подастъ царю самоцветной камень. И царь Давидъ великую честь воздал ему. И поиде Соломан со царева двора в велицей чести. И узрила его царица и прислала по него: «Скоро буди ко мне и принеси камень самоцветной». И Соломан пойде ко царице и принесе камень и подастъ царице. И погасиша свещи и засвети камень самоцветной. И царица рече гостю: «Семо иди ко кровате царьской и ляги со мною, со царицею, на цареве постеле, под царевымъ одеялом». И Соломанъ ляже со царицею на цареве постеле под царевым одеялом. И царица рече: «О чем молвишь, не подвигнешься ко мне?» И Соломан рече: «Страшуся есми царевы постели и царева одеяла». И царица взяла его руку и положила на свои перси и подвигнула его руку на свои груди и промолвила: «То что есть?» И Соломан рече: «Тем есми вскормлен». И подвигнула его руку по белому своему чреву и рече: «То что?» И Соломан рече: «А то мои каменные полаты и терем, и в том есми опочивал». И подвигнула его руку ко своему сраму: «Соломан, то что?» И Соломан рече: «Оттуду есми вышел и свет Божий увидел и по царству пошел». И царица рече: «О безумный, кто еси ты, и премудръ еси ты добре?» И Соломан скочил с царевы кровати и палъ перед нею и заплакал и рече: «Государыня царица, ты мати моя, а я сынишко твой Соломан, твоя, государыня, опала была. Аз весил ум твой с песьим каломъ. И у всякие жены волосы долги, а ум короток».
И пошел ко царю Давиду и рече: «Государь царь Давыд, ты мой батюшко, а я сынишко твой Соломан». И царь Давид бысть в велицей радости и с своею царицею. И на свое царство посадил Соломана. И царь Соломан поидет многим войском и преклонишись ему многия цари и князи, и подают ему великъ выход[1532] своих царствъ. И потом царь Соломан много имехъ царей под своею рукою. И царь Давид пропустил многие лета и говорит тако: «Сыне, мой, Соломоне, пора тебе женится». И царь Соломан по отцову слову, царя Давида повелению, изо многихъ царствъ выбирал собе царицу и выбрал собе царицу прекрасну и мудру: и послал послание во царьство ко царю Пору. И отписал тако: «В прошлое лето был есми в твоем царстве и с царицею твоею пребыл есми в тоем царстве и перьстень с правыя руки снял золотой любимой твой». И послал Соломанъ тот перьстень ко царю Пору в дарехъ. И царь Поръ печален бысть, что перстень его; подпись царства его на перьстне томъ.