Потом утру же светающу, царь же послаше друшку: «Поиди, выкини кости, чаю, давно уже змий заелъ». Друшка же приде и отпер двери и ста отваряти, двери изнутри заперты. Друшка же удивися сему. Слуга же купцевъ вопроси: «Ты кто еси?» Он же отвеща: «А ты кто еси и како взошел сюда?» Слуга же отвеща: «Аз купцевъ слуга». Друшка же рече: «Да кто тебя пустил?» Слуга же рече: «Господинъ мне повелел, не вас бо слушаюсь!» Друшка же рече: «В добромъ ли здравии молодыя?» Слуга же отвеща: «В добромъ здравии и лиходея нашего, змия, уходили!» Друшка же воззопи великимъ гласомъ к царю: «Поиди скоро! Злодея нашего змия уходили, а молодые в добром здравии» Царь же велми воздрадовася и поиде с царицею и велможеми, и виде молодых в добромъ здравии, а змия убита, возрадовашеся радостию велиею зело, а слугу почти и одари дарами честно. И живяше тутъ в царстве много летъ.
Потом восхоте ехати ко отцу своему и просиша у царя. Царь же отпусти ихъ и даша ему треть царства своего. Слуга же не велелъ ему силы[313] брать, а велел взять триста подводъ без людей. Купецъ же рече: «Да-ко кто может ихъ гнать?» Он же ему сказа: «Ты о семъ не тужи, я уже управлюся с ними, возми подводы!» Царь же даде ему и отпусти ихъ с щестию.
Потомъ ехаша они дорогою, купецъ же с царевною, а слуга подводы гонит. И приехаша на тот разбойнический двор, где онъ давил разбойников, и въехаша, ста начевати. И проводиша ихъ в хоромы, а самъ легъ на дворе. Он же в храмине спаша с царевною своею, а слуга насыпал все подводы злата, и сребра, и камения дрогоценава. Поутру же вышедша из храмины и видеша возы насыпана златомъ, и сребромъ, и удивишася сему и поехаша в путь свой.
Потомъ приехаша х тому месту, где у него нанелся, слуга же сталъ говорить: «Господине, аз теперя от тебя иду, даси мне ряжено»[314]. Купецъ же даде ему и разделиша возы пополамъ. Слуга же рече: «Да не обидно ли мне будетъ? Ты владеешь царевною, а мне что?» Он же вопроси его: «Да како намъ ея делити? Возьми ты все триста подводъ, а ея не замай у меня!» Он же ему отвеща: «Тебе обидно будет. Ты ея разруби пополамъ!» Купецъ же заплака: «Возьми ея один к себе, а не замай ея, живу!» Слуга же, не послушав его, выняша мечъ и удариша ее. Она же паде на землю, аки мертва. И выскочиша из нея, иза устъ, змеиное гнездо, в немъ же змеенков семъдесятъ, аки черви колышуща. Слуга же поднявъ ее и перекрести и даде ему живу: «И поди ты живи с нею без опасения, а то бы она тебя съела от сихъ змиевъ. И возми все подводы себе и мое наемъное». И рече: «Знаеши ли ты меня?» Купецъ же рече: «Воистину, не знаю». Он же ему поведал: «Аз есмъ аггелъ Божий. Послал меня Господь Богъ к тебе, за добродетель твою царство даровати, что ты у жидовина мертвое тело скупил и похаронил, и за то тебе царство и богатство». И пусти ихъ, а самъ невидимъ быстъ.