МЕСЯЦА ГЕНВАРЯ ВО 2-Й ДЕНЬ. УСПЕНИЕ СВЯТЫЯ ПРАВЕДНЫЯ УЛЬЯНЕИ, МУРОМЪСКИЕ ЧЮДОТВОРИЦЫ
Во дни благовернаго царя и великого князя Иоанна Василиевича[367] всея Русии от его царьского двора бе мужъ благоверенъ и нищелюбивъ, именемъ Иустинъ, пореклом Недюревъ[368], саномь ключникъ, имея жену, такову же боголюбиву и нищелюбиву, именемъ Стефаниду, Григориеву дщерь Лукина[369], от града Мурома. И живяста во всякомъ благоверии и чистоте, и имяста сыны и дщери, и много богатьства, и рабъ множество. От нею же родися сия блаженная Улияния.
Бывши же ей 6 лет, умре мати ея, и поятъ ю[370] в пределы муромъские баба ея, матери ея мать, вдова Анастасия, Никифора Дубенского дщи, и воспитающе во всякомъ благоверии и чистоте 6 же летъ. И умре баба ея, и по заповеди ея поятъ ю к себе тетка ея Наталия, Путилова жена Арапова.
Сия же блаженная Улияния от младых ногтей Бога возлюби и Пречистую его Матерь, помногу чтяше тетку свою и дщери ея, и имея во всемъ послушание и смирение, и молитве и посту прилежаше. И того ради от тетки много сварима бе[371], а от дщерей ея посмехаема. И глаголаху ей: «О безумная! Что в толицей младости плоть свою изнуряеши и красоту девьственую погубиши?» И нуждаху ю рано ясти и пити. Она же не вдаяшеся воли ихъ, но все со благодарениемъ приимаше и с молчаниемъ отхождаше, послушание имея ко всякому человеку. Бе бо измлада кротка и молчалива, небуява,[372] невеличава и от смеха и всякия игры отгребашеся, аще и многажды на игры и на песни пустотные от сверьстницъ нудима бе[373]. Она же не приставаше к совету ихъ, недоумение на ся возлагаше[374], и темъ потаити хотя своя добродетели. Точию въ прядивномъ и в пяличномъ деле[375] прилежание велие имяше, «и не угасаше свеща ея вся нощи»[376]. А иже сироты и вдовы немощныя в веси[377] той бяху, и всех объшиваше, и всехъ нужных[378] и больныхъ всяцемъ добромь назираше[379], яко всемъ дивитися разуму ея и благоверию. И вселися в ню страхъ Божий, не бе бо в веси той церкви близъ, но яко два поприща[380]. И не лучися ей в девичестемъ возрасте в церковь приходити, ни слышати словесъ Божиихъ почитаемыхъ, ни учителя учаща на спасение николиже, но смысломъ бо Господним наставляема нраву добродетелному.
Егда же достиже 6-го на 10 лета[381], вдана бысть мужу добродетельну и богату, именемъ Георгию, прорекломъ Осорьину, и веньчани быша от сущаго ту попа, именем Потапия