храмины тоя крепко запертъ бяше. Она же оттоле, извещение приемши, возрадовася, славя Бога, и паче перваго добрыхъ делъ прилежаше.
Помале же Божию гневу Русскую землю постигъшу за грехи нашы: гладу велику зело бывшу, и мнози от глада того помирааху. Она же многу милостыню отай творяше, взимаше пищу у свекрови на утренее и на полъденное ядение и все нищимъ гладнымъ даяше. Свекры же глагола ей: «Какъ ты свой нравъ премени! Егда бе хлебу изообилие, тогда не могох тя к раннему и полуденному ядению принудити. А ныне, егда оскудение пищи, и ты раннее и полъдневное ядение взимаешь». Она же, хотя утаитися, отвеща ей: «Егда не родихъ детей, не хотяше ми ся ясти. И егда начахъ дети родити, обезсилехъ и не могу не ясти. Не точию[404] в день, но и нощию множицею хощетъ ми ся ясти, но срамляюся у тебе просити». Свекры же, се слышавъ, рада бысть и посылаше ей пищу довольну не точию в день, но и в нощь, бе бо у нихъ в дому всего обилно, хлеба и всех потребъ. Она же, от свекрови пищу приимая сама, а не ядяше, гладнымъ все раздаяше. И егда кто умирааше, она же наймаше омывати, и погребальное даяше, и на погребение сребреники даяше. А егда в селе ихъ погребахутъ мертвыхъ кого ни буди, о всякомъ моляся о отпущении грехъ.
Помале же моръ бысть на люди силен, и мнози умирааху пострелом[405], и оттого мнози в домехъ запираахуся, и уязвенных постреломъ в домъ не пущаху, и ризам не прикасахуся. Она же, отай свекра и свекрови язвенныхъ многихъ своима рукама в бани омывая, целяше и о исцелении Бога моляше. И аще кто умирааше, она же, многи сироты своими руками омывъ и погребальная возложъ, погребати наймая и сорокоустъ[406] даяше.
Свекру же и свекрови ея въ глубоцей старости во иноцех умерьшимъ, она же погребе ихъ честно. Многу милостыню и сорокоусты по нихъ разда, и повеле служити по нихъ литоргию[407], и в дому своемъ покой мнихомъ и нищимъ поставляше во всю 40-цу[408] по вся дни, и в темницы[409] милостыни посылаше. Мужу бо ея в то время на службе во Астарохани три лета и боле бывшу, она же по нихъ много имения в милостыню истроши, не точию в ты дни, но и по вся лета творя память умерьшимъ.
И тако поживъ с мужемъ лета довольна во мнозе добродеели и чистоте по закону Божию, и роди сыны и дщери[410]. Ненавидяй же добра врагъ тщашеся спону[411] ей сотворити, часты брани воздвизашася въ детехъ и рабехъ. Она же, вся смыслено и разумно разсуждая, смиряше. Врагъ же наусти[412] раба ихъ — и уби сына ихъ старейшаго. Потомъ и другаго на службе убиша. Она же вмале аще и оскорбися[413], но о душяхъ ихъ, а не о смерти, но почти ихъ пениемъ, и молитвою, и милостынею.