Потомъ моли мужа отпустити ю в монастырь, и не отпусти. Но совещавшеся вкупе жити, а плотнаго совокупления не имети. И устрой ему обычную постелю, сама же с вечера по мнозе молитве возлегаше на пещи без постели, точию дрова острыми странами к телу подъстилаше, и ключи железны под ребра своя подлагаше, и на техъ мало сна приимаше, дондеже[414] рабы ея усыпааху. И по томъ вставаше на молитву во всю нощь и до света. И потомъ въ церковь вхожаше к заутрени и к литоргии, и по томъ ручному делу прилежаше и домъ свой богоугодно строяше. Рабы своя довольно пищею и одеяниемъ удовляше и дело комуждо по силе задавааше, вдовами и сироты печашеся и беднымъ во всемъ помагааше.
И поживъ с мужемъ 10 летъ по разлучении плотьне, и мужу ея преставльшуся, она же погребе и[415] честно и почти пениемъ и молитвами, и сорокоусты, и милостынею. И паче мирская отверже, и печашеся о душе, какъ угодити Богу, ревнуя прежнимъ святымъ женам, моляся Богу, и постяся, и милостыню безмерну творя, яко многажды не остати у нея ни единой сребреницы, и займая даяше нищимъ милостыню, и въ церковь по вся дни хождааше к пению. Егда же прихождааше зима, взимаше у детей своихъ сребреники, чимъ устроити одежду, и то раздая нищимъ. Сама же без теплыя одежды в зиму хождааше, в сапоги же босыма ногама обувашеся, точию под нозе свое ореховы скорлупы и чрепие[416] острые вместо стелекъ подъкладаше и тело томяше.
Во едино же время зима бе студена зело, яко земли разсъдатися от мраза. Она же неколико время к церкви не хождааше, но в дому моляся Богу. Во едино же время зело рано попу церкви тоя пришедшу единому в церковь, и бысть ему гласъ от иконы Богородичны: «Шедъ, рцы милостивой Ульянеи, что в церковь не ходитъ на молитву? И домовная ея молитва богоприятна, но не яко церковная. Вы же почитайте ю, уже бо она не меньши 60 летъ, и Духъ Святый на ней почиетъ»[417]. Попъ же, в велицемъ ужасе бывъ, абие прииде к ней, падъ при ногу ея, прося прощениа, и сказа ей видение. Она же тяжко внятъ[418], еже онъ поведа предъ многими, и рече: «Соблазнился еси[419], егда о себе глаголеши. Кто есмь азъ, грешница, да буду достойна сего нарицания». И закля его[420] не поведати никому. Сама же иде въ церковь и, с теплыми слезами молебная совершивъ[421], целова икону Богородицыну. И оттоле боле подвизася к Богу, ходя к церкви.
По вся вечеры моляшеся Богу во отходной храмине[422]. Бе же ту икона Богородицына и святаго Николы. Во единъ же вечеръ вниде в ню по обычаю на молитву, и абие бысть храмина полна бесовъ со всякимъ оружиемъ, хотяху убити ю. Она же помолися Богу со слезами, и явися ей святый Никола, имея палицу, и прогна ихъ от нея, яко дым исчезоша. Единого же беса поймавъ, мучаше. Святую же благослови крестомъ и абие невидимъ бысть. Бесъ же плачя вопияаше: «Азъ ти многу спону творяхъ по вся дни: воздвизах брань в детех и в рабехъ. К самой же не смеяхъ приближитися ради милостыни, и смирения, и молитвы». Она бо, безпрестани в руках имея чотки, глаголя Исусову молитву