Поведа намъ отець Иосифъ Волоцкый о отци Макарии Калязиньскомъ. Глаголаше его быти сродника болшимъ боляромъ тверьскимъ, прародителие же его нарицаеми Кожины. И еще юнну ему сущу, родителие же его сопрягоша ему жену. Онъ же помале увеща ея отоврещися мира и облещися во иноческый образъ. Такоже и онъ оставивъ миръ и бысть мнихъ. И во своихъ местехъ созда манастырь, въ Кашине, на брезе великиа реки Волги, и отчину свою, вси села, приложи тому манастырю. Бе же на томъ месте жилъ земледелець, емуже прозвание Каляга. И смирениа ради не повеле его нарицати своимъ именемъ, но нарече его Калязинъ. Законъ же положи не держати хмелнаго пития, ни ясти, ни пити по келиямъ.
Егда же собрася къ нему немало число инокъ, той же не восхоте священьства приати и начальствовати братиамъ, но во смирении жити. И сего ради, избравъ единаго отъ сущихъ съ нимъ инокъ, поставляетъ игумена, самъ же, яко единъ отъ последнихъ инокъ, пребываше во всякихъ службахъ тружаяся и одеяние всехъ хужьше ношаше, смиренъ и кротокъ зело; и егда кого нарицаше по имени, всякому глаголаше: «Старчушко доброй». И ничимгъ не владяше сущимъ во обители, точию смотряше, еже бы жили по преданому закону манастырьскому.
Игуменъ же присовокупивъ себе некоихъ отъ братий и начаша некоя розоряти сущая обычая въ манастыри: и въ брашне, и питии, и прочая вся не по преданному закону творити. Святый же много наказавъ его, и не послушающу ему, сказавъ о немъ епископу и инаго избравъ себе, поставляетъ игумена. И по времени и тому наченшу темъ же обычеемъ жити, онъ же и того отстави ото игуменъства.
И преспевшу святому възрастомъ до средовечиа, епископъ же наченъ самого его нудити прияти херотонию и начальствовати во своемъ манастыри братии. Такоже и сродници его — Захариа, Бороздинъ прозваниемъ,[61] и инии вси его сродници — едва увещаша его прияти священьство, яко достойна суща. И, благословивъ его, епископъ пославъ его въ манастырь свой начальствовати братии; онъ же шедъ и добре стадо свое пасяше на пажити преданаго имъ закона, и всемъ образъ бысть пощениемъ, и нищетою, и труды, и молитвами, и въ церковномъ правиле всехъ напередъ обреташеся. И тако добре подвизася и поживе въ простоте, якоже великий Спиридонъ.[62] И многи ученики преди пославъ къ Богу, потомъ же и самъ въ старости добре преставися къ Господу, умноживъ данный ему благодати талантъ, и вниде въ радость Господа своего, и поставленъ бысть надъ ученики своими, ихже онъ спасе и ныне спасаетъ въ его обители, ревнующихъ житию его. И положенъ бысть близъ стены церковныя.