Како же правоверным царем и велможам их не достоит сему ревновати, еже в своих селех и весех имати от притяжаниа жит у ратаев житом пятую чясть, кроме же сего ничесоже, злата же и сребра ратаеве недоумеюще, откуду притяжати? Аще же гладни лета, тогда убо мнози мучими суть, ихже и видехом.
[816] Како бо о сем мучению достойни, яко лето мала притяжаниа сподобльше? Ратаеве же мучими сребра ради, еже в царску взимается власть и дается в раздаяние велможам и воином на богатество, а не нужда ради. Нужда бо ради кийждо от велмож своя ратая имут и сими доволни будут, пятую часть у коегождо ратая приемлюще и цареви от сего служаще. Их же ратаем ничтоже инаго никомуже не достоит подаяти, ни ямскаго собраниа своих ради велмож или воиновъ.
Ямская бо правлениа подробну достоит устраяти от града по расписанию и до другаго града. Сим, елицыи во градех купующе и продающе и прикупы богатеюще, достоит сим сий ярем межу всех градов носити, понеже суть стяжатели многа прибытка. Кроме же сего ярму ничесомже никиих улишений да не сподобятся, но во вся грады безо всяких возданий купующе и продающе, и сего ради нарицаемая ямская правления от града до града по написанию исправляти сим достоит. Се убо всякого мятежа в земных умалится: писарем умаление, зборы престанут, мзды неправедныя отлучатся.
А еже землемерителии писарие четвертию меряюще и ратаем многу скорбь ото объяданиа приносяще, о сем убо тако достоит разумети: скорости ради мерныя и вражды и тяжеб межных меряти достоит и отделяти поприщми.[817] Вемы бо, яко четверогранное поприще и в долготу и въпреки по обема концема 1000 сажен мужскъ имат в себе ржаных семен в сеяниа осмь сот тридесят три четверти с третию, в три же поля разделениа ради житнаго поприще таково наричется 278 четвертей без полуосмины в поле, а в дву полех — по толицей же мере.
Се убо поприще удоб ест даст за 250 четвертей в поле и в дву тако же, понеже 28 четвертей без полуосмин изляшняго к коемуждо полю за сено и за лес достоит дати. Изляшняя же та, аще будет земли чисты, се и лепши есть: с сего бо приим хлеб и продав, и купует сено и лес. И тою мерою землемерителнии писарие скорее поспеет четвертныя меры в десятеро: киими денми ныне град описовати, теми денми возмогут десят град описоватися, понеже четвертинная мера — в частости мешкано, сия же поприщми вдруг все около оградит. Сего ради и о землях тяжа не имат быти: аще бо кто хощет прекривити, и убо мера его обличит, яко излишняя чюжая восхити; и у коегоже отъято, тако же мера обличит, яко обиден есть.
Тако убо удобно есть царем повелевати землемерие учрежати поприщми, а не четвертми. Аще убо сам царь во всех своих градех елико восхощет себе поприщ своея ради потребы прияти, и аще где будет в долготу и в преки четерогранно по обема концема десять поприщъ, ту есть по сему счетованию 25 000 четвертей в поле, а в дву полех по толицей же мере, да кроме того за сено и за лес 2775 четвертей в поле, а в дву полех по толицей же мере, и повелитъ на себе житных плодов на лето пятую часть отделити, а Богъ дастъ аще в земли родит зерно пять зерен, и вь едином граде буде его ржа 25 000 четвертей, а яри вдвое того. Аще убо во 100 градех по селику и вь едино лето будет ржи 2000 тысящ и 500 000 четвертей ржи, да яри того вдвое. Есть бо что из сего и продаяти на собрание сребра, а ни един ратай не будет слезен и мучен в недостатцех, еже имати у них з земли хлеб, с лесов же зверие и мед, с рек же рыбы и боброве. Аще ли же где лес вполится, удобно есть медвеннии и звериныя уроки отставляти, понеже уже хлебом дадут с того пятую часть.