Бу җырлар конкурсларда берничә тапкыр җиңү яулады: мәсәлән, «Күр әле бер генә» җыры Швециядә узган Халыкара конкурста Гран-прига лаек булды, «Ялгыз аккош күлләрдә» Татарстанда «Ел җыры» дип танылды.
Алсу Сафина «Әткәй» җырын Казанның 1000 еллыгы уңаеннан оештырылган тантаналарда башкарды. «Минем Уфам – Уралның саф гөле» җыры өчен шагыйрь Уфада «Башкала казанышы» премиясенә лаек булды.
Расих Ханнанов яшь журналистлар һәм әдәбият сөючеләрнең тулы бер буынын тәрбияләде, аларга укучы һәм тыңлаучы белән үзара бәйләнеш булдыруда һәрвакыт ярдәм итәргә омтылды. Шуңа күрә «Ак күгәрчен» конкурсын аның истәлегенә багышлау турында карар кабул ителде. 2020 елда вафатына кадәр соңгы язылган җыры «Ак күгәрчен» дип аталганлыктан, конкурс шулай дип исемләнде.
Тәрәзәм төбенә тышкы яктан
Көн дә ак күгәрчен куна.
Куна да ул, күзен мөлдерәтеп,
Миңа карап тора тын гына.
Кайдан килә ул, бармы хуҗасы,
Әллә югалтканмы оясын?
Ялгызлыкта үзең калсаң гына,
Читләр хәлен нечкә тоясын!
Ул соңласа, мин борчыла башлыйм,
Әйтерсең лә, нәни туганым,
Һәм сизәм мин шул чак күңелемнең
Нәфис хисләр белән тулганын.
«Куып җибәр!» – диләр. Бу мөмкинме?
Аның йөрәге дә ялкындыр.
Хакым бармы начарлык эшләргә,
Бәлки, ул кош синең җанындыр.
Минем әткәй көн дә эшкә китә,
Арып кайта аннан кичләрен.
Елмаюы итеп алып кайта,
Шәфәкъләрнең алсу төсләрен.
Әткәй, әткәй, синнән башка тагын
Кем бар шундый бала бәгырьле?
Кояш сыман әнкәй берәү булса
Син дә безгә шулай кадерле.
Минем әткәй көн дә эшкә китә,
Йолдызларны кайта ияртеп.
Йолдызлар да йоклап китә кебек
Әтиемнән әкият сөйләтеп.
Күл өстендә ялгыз аккош йөзә,
Нигә ялгыз, нигә пары юк?
Парсызларның күңелләре зарлы,
Парлыларның гына зары юк.
Минем дә бар иде, аккошкаем,
Җан дускаем, очар канатым.
Әллә инде артык яратканга
Юлларымда аны югалттым.
Парсыз калса кабат кайтмый, диләр,
Кайта икән, кайта аккошлар.
Кошларны да, кешеләр шикелле,
Үзе белән йөртә язмышлар.
Төннәрендә үзәк өзгеч тавыш,
Телеп үтә күлнең өсләрен.
Аңлар өчен аккош сагышларын
Белү кирәк сөю телләрен.
Ак калфаклар каралмасын,
Заманның җилләрендә.
Һәр гүзәл зат бәхет күреп,
Яшәсен илләрендә.
Кушымта:
Ак калфак, ак калфак,
Кал син һәрчак ак һәм пакъ.
Калфак иман билгесе,
Калфак күңел көзгесе.
Ак калфак, ак калфак,
Һәр чак ап-ак калачак.
Калфак сафлыкка төрер,
Калфак бәхет китерер!
Ак калфаклар саргаймасын,
Сандыкның төпләрендә.
Ак калфаклар – ак күгәрчен,
Булсын ил күкләрендә!
Ап-ак калфак – ак иман ул,
Ул Туган Ил, туган тел.
Милли көйләр, моңлы җырлар,
Гөреф-гадәт, саф күңел.