Вторый лик: Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.
[Ε] Весели́ши Де́во царя́ преесте́ственне, / источа́ющи благода́ть от исто́чника присносу́щную, / сему́ подава́ющи на враги́ кре́пость, побе́ды при́сно, / здра́вие и мир, и проше́ний исполне́ние.
Таже оба лика, сошедшеся вкупе, поют припев: Вели́чит душа́ моя́ / Воскре́сшаго тридне́вно от гро́ба, / Христа́ Жизнодавца.
И ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
И тропарь: Христо́с воскре́се: трижды. И ектениа.
Ексапостиларий. Самогласен:
Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть, / Па́сха нетле́ния, / міра спасе́ние. Трижды.
На хвалитех, Всякое дыхание: поставим стихов 8, и поем стихиры воскресны осмогласника 4, глас 6:
Стих: Сотвори́ти отмще́ние во язы́цех, обличе́ния в лю́дех.
Крест Твой, Го́споди, / жизнь и воскресе́ние лю́дем Твои́м есть, / и наде́ющеся нань, / Тебе́ воскре́сшаго Бо́га на́шего пое́м: поми́луй нас.
Стих: Связа́ти цари́ их пу́ты, и сла́вныя их ручны́ми око́вы желе́зными.
Погребе́ние Твое́, Влады́ко, / рай отве́рзе ро́ду челове́ческому: / и от истле́ния изба́вльшеся, / Тебе́ воскре́сшаго Бо́га на́шего пое́м: поми́луй нас.
Стих: Сотвори́ти в них суд напи́сан: / сла́ва сия́ бу́дет всем преподо́бным Его́.
Со Отце́м и Ду́хом Христа́ воспои́м, / воскре́сшаго из ме́ртвых, / и к Нему́ вопии́м: / Ты Живо́т еси́ наш и Воскресе́ние, поми́луй нас.
Стих: Хвали́те Бо́га во святы́х Его́, / хвали́те Его́ в утверже́нии си́лы Его́.
Тридне́вен воскре́сл еси́, Христе, от гро́ба / я́коже пи́сано есть, / совоздви́гнувый пра́отца на́шего. / Те́мже Тя и сла́вит род челове́ческий, / и воспева́ет Твое́ воскресе́ние.
И Богородицы стихиры, глас 2. Подобен: До́ме Евфра́фов:
Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.
Вода́ исто́чника, спаси́тельная есть / всем немощству́ющим; / присту́пим ве́рою, благода́ть почерпе́м.
Стих: Хвали́те Его́ во гла́се тру́бнем, / хвали́те Его́ во псалти́ри и гу́слех.
Кла́дязь живото́чный исто́чника безсме́ртнаго, / приступа́ющим любо́вию, исцеле́ний подае́т / излия́ние неисчерпа́емое.
Стих: Хвали́те Его́ в тимпа́не и ли́це, / хвали́те Его́ во стру́нах и орга́не.
Укрепля́ет ду́ши вода́ Де́выя, / и́же в скве́рнах страсте́й, / притеце́м ко Отрокови́це, и сия́ измы́ем.