Молитва о храмине, стужаемой от злых духов
Господи Боже спасения нашего, Сыне Бога живаго, на херувимех носимый, превыше сый всякаго начала и власти, и силы, и господства: Ты еси Велий и Страшный над всеми сущими окрест Тебе: Ты еси сотворивый землю в крепости Твоей, и исправивый вселенную в премудрости Твоей: трясый поднебесную от оснований, столпы же ея неподвижны: глаголяй солнцу, и не возсияет; звезды же запечатлеяй: запрещаяй морю, и изсушаяй е: егоже ярость тает начала и власти, и камение сотрошася от Тебе. Врата медная стерл еси, и вереи железныя сломил еси: крепкаго связал еси, и сосуды его раздал еси: мучителя крестом Твоим низложил еси, и змия удицею вочеловечения Твоего привлекл еси, и узами мрака в тартаре посадив связал еси. Сам убо Господи, утверждение на Тя надежду возлагающих, крепкая стено на Тя уповающих, отступити сотвори, отжени и в бегство претвори всякое диавольское действо, и всякое сатанинское нахождение, всякий навет сопротивныя и належащия силы от крова сего, и от одержимых от него, и от обходящих под ним; знамения страшныя на демонов победы креста Твоего носящих, и призывающих имя Твое благое. Ей Господи, легеона демонов отгнавый, и глухому и немому демону и нечистому духу удержавшемуся, от человека изыти и исходу невозвратну быти повелевый: все ополчение невидимых врагов наших потребивый, верныя же и познавшия Тебе умудривый: се даю вам власть, еже попрати верху змиев и скорпиев, и на всю силу вражию. Сам Владыко вышши всякаго вреда и искушения, вся сущия во дому сем сохрани, избавляя их от страха нощнаго, и стрелы летящия во дни, от вещи во тме преходящия, от сряща и демона полуденнаго: да Твои раби, Твоя рабыни и младенцы, Твоя наслаждающеся помощи, а нгельским воинством храними, яко един вси во единомыслии верно поют: Господь мне помощник, и не убоюся, что сотворил мне человек, и паки, не убоюся зла, яко Ты со мною еси. Яко Ты еси Боже утверждение мое, крепкий Обладатель, Князь мира, Отец будущаго века, и царство Твое царство вечное: и Тебе единаго есть царство, и сила, со Отцем и Святым Духом, ныне и присно, и во веки веков. Аминь.