, и между иными куплями посадиша ю продати.
Прииде же блудницам началный и корчьмит купити Тарсису у разбойников, даде за ню 50 златых, введе же ю в дом свой и причта ко скверным девицам нечистаго ради своего и злаго прибыточества. Тарсиса же, видя прелютое зло над собою, нача, рыдая, горко плакати и глаголати: «О Боже, Боже мой, како мя прегоркую и злосчастную в злых моих оставилъ еси? О случаю злополучный, немилостивый, како на мя испустил еси своя стрелы и злосердым копием пробол еси мое сердце? О Боже, сие ми бысть за еже есмь паче всех согрешила, обаче несть во мне, ни в помысле моем никоего зла хотения, точию молитва и книжное прочитание. Почто ми, Боже мой, родитися попустил и родившуюся почто с материю моею в море не ввергоша мя? О Феофиле, был еси ми страшен, обаче прелюбезен бы был, егда бы главу мою отъялъ. Лутчи ми, окаянней, злая смерть, неже скверный и срамный живот![1410]» Узревши же купившаго ю началника блудницъ, паде к ногама его, плача и моля, дабы на чистоту ея не поощрелся и девство ея при ней оставил, и честь кролевского чада не обругал. Рече ей окаянный блудницам началный: «Престани, не тому предана, дабы ти кая милость была дана. Иди и сяди въ первых блудницах, украсившися. Не точию, яже за тебе дах, хощу возвратити, но и сугубую цену твоею красотою имам добыти». И посадив ю, повеле по граду извещати, блудити хотящим, яко есть у него в блудилище новая: таковая девица, какой не бывало.
Услыша сия того града князь именем Антогор, прииде в дом блудницъ и взем за руку Тарсису, введе ю во особую храмину к любодеянию. Тарсиса же, виде збывающеся над собою, и едина токмо со единым паде к ногам Антигора, рече ему с великим плачем, горко рыдая: «О великий княже, преславнейшая природа, премози, иже по естеству похоти мысль[1411], сотвори нрав славный, не буди гонитель и обругатель крове царския, да Богъ за доброе сие, его же покажеши ко мне, сохранит чад твоих от толикаго злаго случая. Аз есмь бедная дщерь великого краля тирского Апполона, иже в злоключениях своих странствуетъ по свету. Мене же даде воспитати во граде Тарсе, и емуже преда, той мя повеле убити. У убийцы же разбойницы мя отъяша и продаша сему злому чеовеку. Ты же, яко славный и благородный, честь мою, и чистоту, и девство сохрани ради вышняго промысла и всех царей, и кралей, и благородныхъ девицъ, и честных жен, чистоту и честь хранящих». Услыша сия князь Антогор премудрый, умилися к жалосному ея молению и рече ей с честию словеса утешителная: «О славная девица, истинная царевна, яко в толиких бедах сама в себе царствуеши. Поклоняюся ти, буди здрава, буди тебе честь и слава вечная, яко в толиких бедах честь снабдеваеши