Посланний же скоро шедше в темницу и обретоша царицу, ницъ лежащу пред образомъ Господнимъ и Богородицы и молящуся со слезами, истомленну зело от поста и печали; младенцы же близъ ея бяху. Вземше же ю и ведоша ко царю, а чада ея несуще. Царица же, ведома, плакаше горко, глаголаше: «Создателю мой Господи! Ты веси, яже[1425] суть, веси, яже ничтоже согрешихъ, о нем же осуждена есмь. Помилуй мя, Создателю мой, щедротъ ради твоихъ и сихъ ради младенцевъ незлобивыхъ; веси, яко царстии суть сынове, а не прелюбодейчища. Не вемъ бо, откуду найде напасть сия на ны, и любимаго ми государя души повреждение, лютыя ради клеветы сея». И паки глаголаше царица: «О всемилостивая Владычице, мати Бога и всехъ, нескверная Девице! Ты веси, Госпоже моя, яко не осквернихъ девства моего, ни брака царьскаго обезчестихъ. Ныне же что приключися, не вемъ се, прииде конечное поругателное осуждение, за высокоумие ли или кое иное погрешение мое. А я же глаголю: неповинна есмь, ты веси, Владычице всехъ. Помилуй мя в часъ сей и младенцовъ сих, сиротъ, ниоткуду имеющихъ помощи. Аще ты не помилуеши, не имамъ, кому помолитися».
И егда приведоша ю близъ царя, она приемше младенцы своя на обою руку и поверже пред ногама царю. Младенъцы же оны осязающе руками младенчески за нозе царя, отца своего, играюще, понеже второе лето бяше по рождении ихъ. Паде же и царица на нозе царю, горко вопиюще, со слезами глаголаше: «Помилуй мя, владыко мой, царю праведный, погибшую ныне душею и телом, а неведущу о сихъ, ничтоже сотворшу, яже есть глаголемое о мне, и како прииде на мя напасть сия смертная и поругательная. Вижду, яко предлежит ми ныне повеленный тобою огнь и в честную руку твою мечь, мне же, бедной, укоризненная смерть. Ей, благий царю, свидетель ми небо и земли, паче же Создатель-Богъ, ими ми веру, яко таковаго зла не сотворихъ, ни помыслихъ во уме своемъ, во вся дни живота своего благая тщахся пред тобою, и сотворихъ по силе моей повиновение, и совесть имехъ, якоже ты веси, якоже подобаетъ женамъ благочестивымъ. Помилуй мя, благий царю, господин мой, и не погуби мене ныне, смиренныя, погибаемыя напрасно, люте утомленную гладомъ и жаждею истаявшую, от печали сокрушенную, не имущую, где главы подклонити и у кого милости попросити, разве Создателя всехъ Бога, в того бо руку твое сердце. Владыко мой, пречестнейший мой господине, ей, во истинну живаго на небесе Бога, сведущаго всехъ тайная сердца, яко не сотворихъ любодейства, ниже помыслихъ на державу твою. К тому не имамъ, что глаголати, точию помилуй мя и даруй ми животъ. Аще ли невозможно, поне младенцевъ сихъ незлобивыхъ помилуй, не погуби ихъ со мною. Верую бо, яко по времени известитъ ти Богъ, яко твое есть царское законное семя в нихъ и мое, бедницы, законное рождение, а не прелюбодейчища. Известитъ ти сведый вся, да не будетъ сокрушение сердцу твоему ихъ ради. Остави ихъ жити, неповинни бо суть, младенцы бо есть».