и яко ветрило на верхъ горъ скорообразно вертящеся. К таковым женам мнози человецы прелщаются: ов добролепием жен, ов разумом, а ин смехотворными утехами, инъ краснословием и дарованием и протчими лестьми прелщаются. Яко речено есть: „Лутчи купите коня или вола, или ризу, нежели злую жену поняти", понеже не мощно познати, какова обычаем: аще и недобролепна или буя, или болна, или блядлива, или горда, или гневлива или иным пороком повреждена и к тому невозможно иныя за себя поняти, доколе она жива. Аще хощеши, сыне мой, без печали жити, то лутче не женитися и опосле не тужити».
Рече сынъ ко отцу своему: «Отче, во Евангелии речено: „Сего ради оставит человек отца своего и матерь и прилепится жене своей и будета оба в плоть едину"[1736]. Богъ же ми дастъ жену добронравну, всякими добродетелми украшенну: смирением, молчанием, послушанием, доброумием, пощением и нищелюбием, рукоделием, нескверноложием. Таковыя жены у Бога милости просят о мужех своих, и когда в дому будут и доброй жене возрадуются и о делех ее, чюжей же радости не зазрю, но всегда радость в дому моем будет».
Рече отецъ к сыну своему: «Сыне, аще будет тебе тако, якоже реклъ еси, блажен еси и добро тебе будет, жена твоя, яко лоза плодовита, аще же грех ради житие зле проводиши и такову жену не обрящеши, якоже хощеши, всегда о ней сердцем скорбиши и в горести сердца речешь: „Блажен той, иже девством живет, да сицевыя жены не обрящет". И ты, сыне, последи злонравную жену не возлюбишь, и в раскаяние придешь, и ничто тебе успеет[1737]. Аще ли сицевую обрящеши: пронырливу, лстиву, лукаву, крадливу, блядливу, злоязычну, обавницу[1738], еретицу, медведицу, лвицу, змию, скорпию, василиску аспидну».
Рече сынъ ко отцу своему: «Отче, не могу разумети словес твоих, скажи ми известно».
Рече отецъ к сыну своему: «Слыши, сыне мой, про лстивую и пронырливую. Сия рукоделия делати не хощет, а как муж ея придет, и она лежит — шипит, стонет, востает — охает, и муж ея сия речет: „Жено, что и о чем скорбиши и ни о чем нерадиши?" И она хотя и здрава, а речет: „Не могу". Сия не строителница дому своему и мужу своему не помощница, и нужного одеяния не сотворит. Аще что муж ея припасет, и она пронырством все изнуритъ[1739].
Слыши, сыне мой, про сварливую и злоязычную: имеет язык, яко бритву изощренну, на всякого человека наскачет, аки лев, всех злословит и укоряет, и осуждает, и на всех яд своего языка испущаетъ.
Слыши, сыне мой, про лукавую и крадливую. Лукавство женское сице: имеет умъ остр, пред мужем своим показует, и никако же муж ея не может лукавства женского разумети, ибо с мужем живет аки бы единодушно, а в сердцы своем мыслит: „Аще муж мой умрет, а живота своего мне не прикажет, и мне за иного мужа поити не с чем и никто меня убогую за себя не возмет". И се глаголя, мыслит: „Ныне есми всему добру госпожа, учиню себе сокровище тайное". И начнет у мужа своего красти, а он того не ведает и сице к ней речет: „Жено, что обнищахом и в велицей скудости дом нашъ сотворися?" Она речет: „А то, господине, грех ради наших". Сия ли не крадливая, иже все имение мужа своего погубит и оба обнищают?