. Аще ядяше и пияаше или что делая
[424], непрестанно молитву глаголаше. Егда бо и почиваше, уста ея движастася и утроба подвизастася
[425] на славословие Божие. Многажды видехомъ ю спящу, а рука ея чотки отдвигаше. Бесъ же бежа от нея, вопияаше: «Многу беду ныне прияхъ тебе ради, но сотворю ти спону на старость: начнеши гладомъ измирати, не чюжихъ корьмити». Она же знаменася крестомъ — и исчезе бесъ от нея. Она же к намъ прииде ужасна вельми
[426] и лицемъ пременися. Мы же, видехомъ ю смущену, вопрашахомъ, — и не поведа ничтоже. Непомнозе
[427] же сказа намъ тайно и заповеда не рещи никому.
И поживе во вдовъстве 9 летъ, многу добродетель показа ко всемъ, и много имения в милостыню разточи, точию нужные потребы домовъные оставляше, и пищу точию годъ до года розчиташе, а избытокъ вся требующимъ растакаше[428]. И продолжися животъ ея до царя Бориса. В то же время бысть гладъ крепокъ[429] во всей Русстей земли[430], яко многимъ от нужды скверных мясъ и человеческихъ плотей вкушати, и множество человекъ неизчетно гладомъ изомроша. В дому же ея велика скудость пищи бысть и всехъ потребных, яко отнюдъ не прорасте из земли всееное жита ея. Кони же и скоты изомроша. Она же моляше дети и рабы своя, еже отнюд ничему чужу и татьбе[431] не коснутися, но елико оставшыя — скоты, и ризы, и сосуды — вся роспрода на жито, и от того челядь корьмяше, и милостыню довольну даяаше, и в нищете обычныя милостыни не розстася, и ни единого от просящих не отпусти тща[432]. Дойде же в последнюю нищету, яко ни единому зерну остатися в дому ея. И о томъ не смятеся, но все упование на Бога возложи.
В то бо лето преселися во ино село в пределы нижеградъцкия[433], и не бе ту церкви, но яко два поприща. Она же, старостию и нищетою одержима, не хождааше к церкви, но в дому молящися. И о томъ немалу печаль имяше, но поминая святаго Корнилия, яко не вреди его и домовная молитва[434], и иныхъ святыхъ. Велице же скудости умножьшися в дому ея. Она же распусти рабы на волю, да не изнурятся гладомъ. От них же доброразъсуднии обещахуся с нею терпети, а инии отъидоша. Она же со благословениемъ и молитвою отпусти я, не держа гнева нимало. И повеле оставшим рабомъ собирати лебеду и кору древяную, и в томъ хлебъ сотворити. И от того сама съ детьми и рабы питашеся, и молитвою ея бысть хлебъ сладокъ[435]. От того же нищимъ даяаше и никого тща не отпусти, в то бо время без числа нищих бе. Соседи же ея глаголаху нищимъ: «Что ради в Ульянин домъ ходите? Она бо и сама гладомъ измираетъ». Они же поведаша имъ: «Многи села обходим и чистъ хлебъ вземлемъ, а тако в сладость не ядохомъ, яко сладокъ хлебъ вдовы сея». Мнози бо имени ея не ведаху. Соседи же, изобильна хлебомъ, посылааху в домъ ея просити хлеба, искушающе ю. И такоже свидетельствующа, яко вельми хлебъ ея сладокъ. И дивися человеку к себе: «Горазди рабы ея печь хлебовъ!» И не разумеюще, яко молитвою ея хлебъ сладокъ. Потерпе же в той нищете два лета, не опечалися, ни смутися, ни поропта, и «не согреши ни во устах своихъ, и не дастъ безумия Богу