Ми́ром Го́споду помо́лимся.
Подобает ведати, я́ко по внегда начати иерею, кадит святую трапезу по обычаю и весь олтарь, вечер, на Го́споди воззва́х: на Утрени, в начале канона исходит и кадит храм и лики и братию по обыкновенному чину.
Посем, Го́споди воззва́х: поставим стихов 6. И поем стихиры воскресны, глас 5.
Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.
Честны́м Твои́м Кресто́м, Христе́, / диа́вола посрами́л еси́, / и Воскресе́нием Твои́м жа́ло грехо́вное притупи́л еси́, / и спасл еси́ ны от врат сме́ртных: / сла́вим Тя, Единоро́дне.
Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.
Воскресе́ние дая́й ро́ду челове́ческому, / я́ко овча́ на заколе́ние веде́ся, / устраши́шася сего́ кня́зи а́дстии, / и взя́шася врата́ плаче́вная. / Вни́де бо Царь сла́вы Христо́с, / глаго́ля су́щим во у́зах, изыди́те: / и су́щим во тьме, откры́йтеся.
Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.
Ве́лие чу́до, / неви́димых Соде́тель, за человеколю́бие пло́тию пострада́в, / воскре́се Безсме́ртный. / Прииди́те оте́чествия язы́к, Тому́ поклони́мся: / благоутро́бием бо Его́ от пре́лести изба́вльшеся, / в Трие́х Ипоста́сех Еди́наго Бо́га пе́ти навыко́хом.
И восточны (Анатолиевы) 3, глас тойже.
Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.
Вече́рнее поклоне́ние / прино́сим Тебе́, Невече́рнему Све́ту, / на коне́ц веко́в, я́ко в зерца́ле пло́тию возсия́вшему мiрови, / и да́же до а́да низше́дшему, / и та́мо су́щую тьму разруши́вшему, / и свет Воскресе́ния язы́ком показа́вшему: / Светода́вче Го́споди, сла́ва Тебе́.
Стих: Хвали́те Го́спода вси язы́цы, похвали́те Его́ вси лю́дие.
Нача́льника спасе́ния на́шего, / Христа́ славосло́вим: / Тому́ бо из ме́ртвых воскре́сшу, / мiр от пре́лести спасе́н бысть. / Ра́дуется лик А́нгельский, / бе́гает де́монов пре́лесть, / Ада́м пады́й воста́, / диа́вол упраздни́ся.
Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.
И́же от кустоди́и науче́ни быва́ху от беззако́нник, / покры́йте Христо́во Воста́ние, / и приими́те сре́бреники, и рцы́те / я́ко нам спя́щим, из гро́ба укра́ден бысть Ме́ртвый. / Кто ви́де, кто слы́ша, мертвеца́ укра́дена когда́, / па́че же пома́зана и на́га, / оста́вльша и во гро́бе погреба́льная Своя́? / Не прельща́йтеся иуде́е, / навы́кните рече́нием проро́ческим, и уразуме́йте, / я́ко Той есть вои́стинну Изба́витель мiра, и Всеси́льный.