Сия же слышав, цысарь преклонись на ихъ прошенье и разосла по многимъ королевъствомъ своего господарьства повеле избрати деву юну и лепу, достойну царьствия своего. Обретоша же в некоемъ граде Костеле[878] деву красну зело, ея же приведоша к цысарю. Ю же узревъ, почюдися красоте ея и возлюби ю зело, и забы любве, еже име к первой жене своей, сотвори бракъ чюден и пресветелъ зело. Созва на веселие брака того все крали Римъския области, радныя панове и боляре, и дворяне, и многое множество людей господарьства своего. Гласу же и звуку бывшу велию от брачнаго потешного учреждения, еже кимьваломъ и литаврь, и на кровъ громогласия еже трубного клицания, и еже сурны сладкогласия, цымбалов же звяцания и аргановъ многогласия, и иных много различныхъ мусикейскихъ согласия. Людем же всемъ всякого чину, веселящимся и славящимъ господаря своего цысаря и цысареву величающимъ.
Браку же мимо шедшу, сыну же цысареву на браку не бывшу, моления ради матери его еже ко отцу его, цысарю, бе убо в то время у мудрецовъ на училищи.
По некоемъ времяни сказаша цысареве, мачесе его, еже о цысареви сыне Диоклитияне.
Мачеха же Диоклитияня, слыша сия, нача негодовати и зле мыслити, дабы цысаря по сыне его в забвенье привести, еже не воспомянути его или инако погубити, мысля же убо се не едино лето.
Во едину же от нощей цысарю, лежащу с нею на постеле, и нача ей глаголати: «О вселюбезная и пресладкая, свете очию моею, утехо и возжделение сердечное, милая, прекрасная моя цысарева! Ничтоже в поднебесной точно твоей красоте, ничтоже любезнее тебя предъ очима моима, вся ни во чтоже суть, проси, еже хощеши, да сотворю прошение твое и не буди тое же, в чем преслушаюсь, но вся буди по воли твоей и ничто от тайны моей да не утаится тебе».
Она же, видевъ цесарево усердие и несумненную ласку и любовь еже к себе, и восприимши дерзновение, рече к нему: «О пресветлый и великий цысарю, господарь мой милый, аще праведно любиши мя от душа своея, даждь мне видети сына твоего и моего, Богом данного Диоклитияна!» Он же рече: «Се по воли твоей учиню».
И вскоре к мудрецем повеле написати послание сице от пресветлейшаго и преславнейшаго, достохвалнаго великого господаря Елиазара, цысаря Римъския области и многоименитыхъ господарьствъ повелителя:
«Ведомо да есть вамъ, немалымъ летомъ мимошедшимъ отлучихся сладчайшаго ми сына Диоклитияна. Сего ради болезнуетъ ми душа и плачет ми сердце, понеже много летъ не видехъ его пресветлаго образа и не слышах от устъ его премудрыхъ и медоточных словесъ. Ныне же помышление вниде в сердце мое, да аще не узрю вскоре его и не слышу словесъ его, зле гоньзнетъ ми животъ